Un final inesperado tivo este venres a concentración veciñal convocada para protestar pola okupación ilegal dunha casa de dúas plantas con leira na parroquia pontevedresa de Salcedo. Nos últimos días a veciñanza expresou o seu rexeitamento e malestar ante esta okupación por parte de dous individuos. Nas redes sociais difundiuse estes días a convocatoria dunha mobilización de protesta ante esta vivenda e alí acudiron numerosos veciños e tamén a Policía Local e a Nacional, o único que non estaba no lugar era o okupa. Aproveitando esta circunstancia os veciños irromperon na casa e cando o okupa regresou ao lugar xa non lle deixaron entrar na vivenda, nin sequera a recoller as súas pertenzas segundo pediu. Producíronse entón uns momentos de tensión que se resolveron sen incidentes tras a intervención policial. Desaloxo dunha casa okupada en Salcedo Pontevedra Viva Segundo explicaron os residentes da zona, todo este problema empezou o pasado 16 de xullo cando uns individuos accederon a este inmoble pola forza e sen permiso do propietario que é unha persoa maior que vive nunha residencia xeriátrica desde fai máis de dous anos e que non ten capacidade para denunciar nin a ninguén habilitado para que actúe no seu nome. A alarma veciñal foi crecendo nos últimos días ante a trasfega de vehículos con persoas descoñecidas, segundo relataron os veciños. A Policía Nacional xa acudira con anterioridade ao lugar e chegaron a identificar á parella ocupante da casa, sendo detida esta muller tras comprobar que tiña pendente un requirimento xudicial. Esta persoa foi trasladada para prestar declaración e pouco despois quedou en liberdade. Os veciños esperan que tras o vivido este venres estes individuos desistan da súa intención de ocupar a vivenda e abandonen a parroquia. Aseguran que estarán vixiantes.