AI Job Loss: . చాట్‌జీపీటీ, గూగుల్ జెమినీ, గ్రోక్ ఏఐ వంటి ఎన్నో ఏఐ టూల్స్ రావడంతో చాలా రంగాల్లో విప్లవాత్మక మార్పులు వస్తున్నాయన్న సంగతి తెలిసిందే. ఈ క్రమంలోనే చాలా మంది ఉద్యోగుల్లో భయాలు కూడా పుట్టుకొస్తున్నాయి. ఇప్పటికే చాలా రంగాల్లో ఏఐ వినియోగం పెరిగిపోతోంది. ఏఐ రాకతో ఇప్పటికే వేలాది ఉద్యోగాలు కూడా పోయాయి. 2 రోజుల కిందట ఐటీ దిగ్గజం టాటా కన్సల్టెన్సీ సర్వీసెస్ కూడా ఏఐతో వస్తున్న మార్పుల నేపథ్యంలో సుమారు 12 వేల మందికిపైగా తమ ఉద్యోగుల్ని తొలగించనున్నట్లు వెల్లడించింది. దీంతో.. భవిష్యత్తులో ఏఐ.. ఉద్యోగాలను ఎలా ప్రభావితం చేయనుందనే భయాలు మరింత పెరిగిపోయాయి. అయితే తాజాగా దీనిపై.. వ్యాఖ్యానించారు. ఇటీవల ఫెడరల్ రిజర్వ్ బోర్డ్ ఆఫ్ గవర్నర్స్ కాన్ఫరెన్స్‌లో మాట్లాడిన ఆల్ట్‌మన్.. AI వ్యవస్థలు కస్టమర్ సర్వీస్ ఉద్యోగాలను పూర్తిగా తొలగిస్తాయని, వైద్య రంగంలో ఏఐ.. మనుషుల (వైద్యులు) కంటే మెరుగైన రోగ నిర్ధారణ చేయగలవని, ప్రపంచ దేశాధినేతలు కూడా ఏఐ సలహాలను పాటిస్తారని, శత్రు దేశాలు ఏఐన ఆయుధంగా ఉపయోగించే ప్రమాదం ఉందని హెచ్చరించారు. అమెరికా అధ్యక్షుడు డొనాల్డ్ ట్రంప్ ప్రభుత్వం.. AI అభివృద్ధిని వేగవంతం చేయడానికి చర్యలు తీసుకుంటుండగా.. ఆల్ట్‌మన్ వ్యాఖ్యలు చర్చనీయాంశంగా మారాయి.ముఖ్యంగా కస్టమర్ సపోర్ట్ ఉద్యోగాలు పూర్తిగా తొలగిపోతాయని సామ్ ఆల్ట్‌మన్ చెప్పారు. కస్టమర్ సపోర్ట్ విషయంలో ఏఐ.. ఇప్పటికే ఆధిపత్యం చెలాయిస్తోందని ఆయన అభిప్రాయపడ్డారు. "ఇప్పుడు మీరొక కాల్ చేస్తే.. ఏఐ సమాధానం ఇస్తుంది. ఇది చాలా తెలివైన, సమర్థుడైన వ్యక్తిలా ఉంటుంది. సదరు కంపెనీలోని కస్టమర్ సపోర్ట్ ఏజెంట్ చేయగలిగే ప్రతి పని కూడా ఇది చేయగలదు. ఇది తప్పులేం చేయదు. చాలా వేగంగా స్పందిస్తుంది. మీరు ఒక్కసారి కాల్ చేస్తే.. పని జరిగిపోతుంది" అని ఆల్ట్‌మన్ అన్నారు.వైద్య రంగంలో కూడా ఏఐ సామర్థ్యాలను గురించి మాట్లాడిన ఆయన.. 'ChatGPT చాలా సందర్భాల్లో వైద్యుల కంటే మెరుగైన రోగ నిర్ధారణ చేయగలదని' అభిప్రాయపడ్డారు. అయితే.. వైద్య సంరక్షణలో మానవ వైద్యుల ప్రమేయం లేకుండా ఏఐని పూర్తిగా నమ్మేందుకు ఆయన సుముఖంగా లేరు. ముఖ్యంగా ట్రంప్ యంత్రాంగం.. AI అభివృద్ధిని వేగవంతం చేసింది. కొత్త కొత్త ప్రణాళికల్ని ప్రకటించింది. ఏఐ మౌలిక సదుపాయాలను అభివృద్ధి చేయడం, డేటా సెంటర్లను నిర్మించడం వంటి చర్యలు తీసుకోవాలని యోచిస్తోంది. ఇది అంతకుముందున్న జో బైడెన్ ప్రభుత్వ విధానాలకు పూర్తి భిన్నంగా ఉంది.