O Encoro do Pontillón do Castro, en Verducido, acolleu este fin de semana a LVI edición do Campionato de España de Sprint Olímpico, na que participaron máis de 800 padeeiras e onde os representantes pontevedreses lograron numerosos metais nas categorías júnior e sénior. Na modalidade masculina sénior, o Club Naval de Pontevedra destacou no K2 1000 metros, onde Marcos González e Martín Recamán conquistaron a medalla de ouro. En K1 500 metros sénior masculino, Antonio Palmas do Club Piragüismo Vilaboa colgouse o bronce, mentres que Carlos Pérez (Club de Mar Ría de Aldán-Gandón) foi subcampión. En K4 1000 metros, o equipo do Club Naval de Pontevedra formado por Carlos Álvarez, Alexandre Castro, Felipe Dobarroy José Julio Villanueva obtivo a medalla de bronce cun tempo de 3:02,73. En C1 sénior feminino, Claudia Couto (EP Ciudad de Pontevedra) logrou a prata en 200 metros con 0:48,91 e foi terceira en 500 metros (2:16,06). En categoría sénior C2 500 metros masculina, o dúo formado por Pablo Crespo e Martín Jácome (EP Ciudad de Pontevedra) fixéronse co bronce con 1:40,34. Ademais, Crespo xunto a Jaime Duro foron segundos en C2 1000 metros sénior masculino con 3:41,71. En embarcacións femininas de catro tripulantes, o Club Náutico O Muíño de Ribadumia conseguiu medalla de bronce en C4 200 metros (49,19). Silvia Gago (Club Náutico O Muíño de Ribadumia) obtivo o segundo posto en C1 júnior 200 metros (0:51,56) e dous terceiros postos C1 júnior 500 metros (2:22,18) e en 1000 metros (4:54,58), mentres que a tamén júnior Natalia Moreira (EP Ciudad de Pontevedra) tivo unha excelente actuación coas pratas en K1 200 metros (44,16) e en K1 500 metros (2:01,51), un bronce en K2 200 metros con Sara Prieto (0:42,33) e outra prata en K2 500 xunto á mesma compañeira (1:51,62). Lorena Pérez e Candela Álvarez, do Club Piragüismo Verducido Pontillón, coroáronse campioas en K2 200 metros júnior feminino cun tempo de 40,72 e lograron a medalla de bronce en K2 500 (1:52,82). En K1 1000 metros júnior masculino, Alexandre Míguez (Club Piragüismo Vilaboa) conseguiu a terceira praza con 3:41,61. En C1 júnior feminino, Silvia Gago subiuse ao podio en todas as distancias, mentres que en kaiak e canoa de catro integrantes a EP Ciudad de Pontevedra colocou varios deportistas no podio en categorías sénior e júnior- Por último, nas probas de K1 e K2 houbo destacadas actuacións individuais e por equipos de deportistas vinculados a clubs de Pontevedra como o Club Náutico O Muíño de Ribadumia, Club Piragüismo Vilaboa e Club Piragüismo Verducido Pontillón, entre outros.