امریکا کے صدر ڈونلڈ ٹرمپ نے وینزویلا کے گرفتار صدر نکولس مادورو کی پہلی تصویر پوسٹ کردی۔امریکی صدر ڈونلڈ ٹرمپ نے سوشل میڈیا پر وینز ویلا کے گرفتار صدر نکولس مادورو کی تصویر شیئر کی جس میں ان کے ہاتھوں میں ہتھکڑی لگی ہوئی ہے۔ٹرمپ نے کہا کہ آپ نے تصویر دیکھ لی ہے کہ نکولس کیسے کپڑوں میں تھے۔انہوں نے کہا کہ میری ہدایت پر امریکی فوج نے وینزویلا میں آپریشن کیا، امریکی فوج نے وینزویلا کے دل میں تاریخی آپریشن کیا اور میں نے پوری کارروائی فلم کی طرح لائیو دیکھی۔انہوں نے کہا کہ نکولس کو ان کی اہلیہ کے ساتھ گرفتار کیا گیا ہے، صدر کو پتا تھا کہ امریکی بحری بیڑے قریب آرہے ہیں۔امریکی صدر نے کہا کہ آپریشن میں کسی امریکی فوجی یا عسکری تنصیب کا نقصان نہیں ہوا، آپریشن کے دوران کوئی امریکی فوجی زخمی یا مارا نہیں گیا۔ امریکی میڈیا کے مطابق مادورو اور اہلیہ سیلیا فلوریس کو امریکی فورسز نے ان کے بیڈروم سے پکڑا۔خیال رہے کہ امریکا نے وینزویلا پر حملہ کردیا اور وینزویلا کے صدر نکولس مادورو اور ان کی اہلیہ کو گرفتار کرلیا۔کارروائی امریکی جنگی طیاروں نے کی اور ڈیلٹا فورس نے دارالحکومت کاراکاس میں اہداف کو نشانہ بنایا۔ وینزویلا نے حملوں کو جارحیت قرار دے دیا اور کہا کہ حملے کا مقصد وینزویلا کے تیل اور معدنیات پر قبضہ کرنا ہے۔