ఆంధ్రప్రదేశ్‌లో కూటమి ప్రభుత్వం అధికారంలోకి వచ్చిన కొత్తల్లో కొందరు పిఠాపురం ఎమ్మెల్యే గారి తాలుూకా అంటూ కొందరు జనసైనికులు బైక్‌ల నంబర్ ప్లేట్లపై రాయించారు. వారు మాత్రమే కాదు మిగిలిన రాజకీయ నేతల అనుచరులు కూడా ఈ ట్రెండ్ ఫాలో అయ్యారు. అయితే ట్రాఫిక్ పోలీసులు అలా చేయొద్దని.. నిబంధనలకు విరుద్ధమని చెప్పడంతో చాలామంది వాటిని తొలగించారు. అయితే తాజాగా ఇదే తరహాలో ఒక ఆసక్తికర ఘటన జరిగింది.. ఓ కానిస్టేబుల్ ఏకంగా తన బైక్ నంబర్ ప్లేట్‌పై డీజీపీగారి తాలూకా అని రాయించడం చర్చనీయాంశమైంది.గుంటూరు జిల్లా తాడేపల్లి మాజీ ముఖ్యమంత్రి వైఎస్ జగన్ నివాసం దగ్గర బందోబస్తులో ఉన్న తన బైక్ నంబర్‌ ప్లేట్‌పై విచిత్రంగా "ఏపీ డీజీపీ గారి తాలూకా" అని రాసుకున్నాడు. దగ్గర బందోబస్తు విధుల కోసం అనంతపురం జిల్లాకు చెందిన ఏపీఎస్పీ 14వ బెటాలియన్‌కు చెందిన ఆ పోలీస్ వచ్చినట్లు తెలుస్తోంది. అక్కడ తన వాహనం నంబర్‌ ప్లేట్‌పై ఇలా రాసుకున్నాడు.. ఇది చాలామంది దృష్టిని ఆకర్షించింది. అయితే ఈ నంబర్ ప్లేట్ విషయాన్ని పోలీసులు మొదట గుర్తించలేదు.. ఈ బైక్ జగన్ తాడేపల్లి నివాసం దగ్గర పార్క్ చేసి ఉండటంతో కొందరు మీడియా ప్రతినిధులు ఫోటోలు తీశారు. ఆ తర్వాత ఈ నంబర్ ప్లేట్ వైరల్ కావడంతో అక్కడి పోలీసు అధికారులకు కూడా తెలిసింది. వారు వెంటనే ఈ నంబర్ ప్లేట్ విషయాన్ని ఉన్నతాధికారుల దృష్టికి తీసుకువెళ్లారు. దీంతో వెంటనే ఆ నంబర్‌ ప్లేట్‌ను తొలగించాలని ఆదేశించడంతో.. మంగళవారం ఆ పోలీస్ ఆ నంబర్‌ ప్లేట్‌ను తొలగించినట్లు తెలుస్తోంది. మొన్నటి వరకు రాజకీయ నేతల అనుచరులు ఈ ట్రెండ్ ఫాలో అయ్యారు.. ఇప్పుడేమో ఒక పోలీస్ ఏకంగా "ఏపీ డీజీపీ గారి తాలూకా" అని తన వాహనంపై రాయడంపై చర్చ జరిగింది. చివరికి తొలగించడంతో వివాదం లేకుండా పోయింది. మొత్తం మీద డీజీపీ గారి తాలూకా నంబర్ ప్లేట్ కూడా వైరల్ అయ్యింది.