O Pontevedra Club de Fútbol xa quenta motores de cara á nova tempada en Primeira RFEF. E é que, en apenas unha semana, o conxunto granate disputará o seu primeiro partido de pretempada no marco do Trofeo Luís Otero. Será, concretamente, o sábado 26 de xullo, ás 19:00 horas, contra a Cultural Leonesa, equipo recentemente ascendido á Liga Hypermotion, a Segunda División. De cara ao enfrontamento, o club confirmou a apertura de todas as bancadas do estadio e estableceu un único prezo para todas elas. Os abonados poderán acceder de maneira gratuíta presentando o carné de socio, mentres que a entrada do público xeral terá un prezo único de 10 euros, independentemente da bancada. As persoas xuvenís (até 17 anos) terán que pagar 5 euros e os nenos e nenas de até 6 anos poderán acceder de forma gratuíta. En todos os casos, os menores de 16 anos deberán acudir acompañados dun adulto. As entradas poden adquirirse de maneira online a través da páxina web oficial do Pontevedra CF; de forma presencial na oficina do club, de luns a xoves en horario de 9:00 a 19:00 horas; ou nos despachos de billetes de Pasarón o mesmo día do partido a partir das 18:00 horas.