EPFO: ఉద్యోగులకు అదిరే శుభవార్త అందించింది ఉద్యోగుల భవిష్య నిధి సంస్థ ఈపీఎఫ్ఓ. పీఎఫ్ అకౌంట్ బ్యాలెన్స్ చెక్ చేయడం, పాస్‌బుక్ డౌన్‌లోడ్ చేసుకోవడాన్ని మరింత సులభతరం చేసింది. డిజిలాకర్ యాప్‌లో (Digilocker) ఈపీఎఫ్ సేవలను అందుబాటులోకి తీసుకొచ్చింది. ఈ యాప్ సాయంతో పీఎఫ్ ఖాతాదారులు తమ పీఎఫ్ బ్యాలెన్స్ ఎప్పుడైనా, ఎక్కడి నుంచైనా తెలుసుకోవచ్చు. అలాగే పాస్‌బుక్, ఇతర డాక్యుమెంట్లను యాక్సెస్ చేయవచ్చని ఈపీఎఫ్ఓ తెలిపింది. ఈ మేరకు సోషల్ మీడియా ఎక్స్ వేదికగా పోస్ట్ చేసింది. అలాగే యూఏఎన్ కార్డు, పెన్షన్ పేమెంట్ ఆర్డర్ (PPO), స్కీమ్ సర్టిఫికెట్ వంటి సేవలను డిజిలాకర్ ద్వారానే పొందవచ్చని తెలిపింది. పాస్‌బుక్ డౌన్‌లోడ్ అనేది ఉమాంగ్ యాప్ ద్వారానే ఉండేది. ఇప్పుడు డిజిలాకర్‌లోనూ అందుబాటులోకి వచ్చిందని చెప్పవచ్చు. అయితే, ప్రస్తుతం ఆండ్రాయిడ్ మొబైల్ యూజర్లకు మాత్రమే ఈ ఈపీఎఫ్ ఫీచర్ అందుబాటులోకి వచ్చిందని తెలిపింది. ఐఓఎస్ యూజర్లకు త్వరలోనే అందుబాటులోకి తీసుకొస్తామని తెలిపింది. మరోవైపు ప్రావిడెంట్ ఫండ్‌కి సంబంధించిన సర్వీసులను ఉమాంగ్ యాప్‌తో పాటుగా పీఎఫ్ఓ వెబ్‌సైట్లోనూ అందుబాటులో ఉంటాయని ఈపీఎఫ్ఓ తెలిపింది. అలాగే ఎస్ఎంఎస్ ద్వారా కావాలనుకునే వారు యూఏఎన్‌తో లింక్ అయిన మొబైల్ ద్వారా 77383 99899 నంబర్‌కు EPFOHO UAN అని మెసేజ్ చేసినట్లయితే పీఎఫ్ బ్యాలెన్స్ తెలుసుకోవచ్చు. ఈ ఎస్ఎంఎస్ సేవలతో ఏ భాషలోనైనా పీఎఫ్ బ్యాలెన్స్ పొందవచ్చు. మొత్తం 10 భాషలను ఈ ఎస్ఎంఎస్ సేవలు సపోర్ట్ చేస్తాయి. ఆంగ్లంతో పాటుగా తెలుగు, హిందీ, తమిళ్, కన్నడ, మళయాళం, మరాఠీ, పంజాబీ, బెంగాలీ, గుజరాతీ భాషల్లో బ్యాలెన్స్ తెలుసుకోవచ్చు. ఏ భాషలో కావాలంటే ఆ భాష కోడ్ టైప్ చేసి ఎస్ఎంఎస్ పంపించాల్సి ఉంటుంది. ఉదాహరణకు తెలుగులో పీఎఫ్ అకౌంట్ బ్యాలెన్స్ పొందాలని అనుకుంటే అప్పుడు మీరు EPFOHO UAN TEL అని టైప్ చేసి మీ రిజిస్టర్డ్ మొబైల్ నుంచి 7738299899 నంబర్‌కు మెసేజ్ పంపించాలి. దీంతో పీఎఫ్ ఖాతాదారులకు తమ ఖాతా బ్యాలెన్స్ వివరాలు ఎస్ఎంఎస్ రూపంలో తెలుగులో వస్తాయని ఈపీఎఫ్ఓ తెలిపింది.