Uns 120.000 euros máis ao ano. É o que crecerá o custo do persoal do Concello de Pontevedra coa nova subida salarial que aprobou o goberno municipal. É un 0,5% que se incluirá no complemento específico que reciben os máis de 500 traballadores que integran o persoal do Concello. A tenente de alcalde, Eva Vilaverde, explicou que este aumento terá efectos retroactivos desde o 1 de xaneiro de 2024. O pago de atrasos custará ás arcas municipais algo máis de 175.000 euros. Esta medida beneficiará tanto ao persoal funcionario como ao persoal laboral. O Concello cumpre así o acordo adoptado polo Consello de Ministros o pasado 2 de xullo, que xa recollía esa subida do 0,5% de oficio para a parte do salario. A Xunta de Goberno celebrada este xoves aprobou ademais contratar ás empresas Beta Group Services e Inter-anima Events, por 82.000 e 393.000 euros, respectivamente, as actividades de formación para o sector turístico e de promoción de Pontevedra Capital Gastro. Ambos os contratos, que inclúen iniciativas de dinamización da praza de abastos, terán unha duración de doce meses e están financiados con fondos europeos. Ademais, o Concello concedeu unha prórroga de seis meses para concluír as obras de rehabilitación do edificio administrativo de Churruchaos, que se concede tras os problemas detectados na cuberta do inmoble.