O Poio Pescamar protagonizou este sábado unha gran remontada para rescatar un punto na súa visita ao Guadalcacín, nun partido onde as gaditanas dominaron a primeira metade cun marcador de 2-0. O equipo vermello aumentou o ritmo na segunda parte, Chuli reduciu diferenzas e Zaide Pérez logrou empatar a falta de sete segundos do final. O partido comezou cun Guadalcacín dominador, avisando no minuto 2 cun contragolpe que terminou nun remate ao traveseiro de Ame Romeu. As gaditanas controlaban o balón, mentres que as visitantes non lograban conectar dúas pases seguidos para plantarse con claridade en campo rival. O primeiro gol do partido chegou no minuto 8. Lora disparou de volea e Rafa Pato, no seu intento de despexe, introduciu o balón na súa propia porta. Un minuto despois, tras unha perda en ataque do Poio, Ame Romeu aproveitou o man a man con Elena para anotar o 2-0 e pór máis terra polo medio. López-Tulla solicitou tempo morto para axustar o equipo e aumentar o ritmo, pero o Poio non puido reducir a distancia antes do descanso, a pesar de senllos disparos á madeira de Débora e Carolina Pedreira. Despois do paso polos vestiarios o dominio do encontro cambiou de bando por completo e foi o equipo vermello o que se fixo coa posesión e as ocasións. Ale de Paz e Candea avisaron e Chuli logrou recortar diferenzas no minuto 28. As conserveiras querían o empate, Martita entrou como porteira-xogadora a falta de seis minutos para a conclusión e o equipo intensificou o asedio. Débora tivo unha clara oportunidade no 36 coa que puido igualar, pero foi a sete segundos do final cando se atoparon co premio. Tras unha gran combinación, Zaide Pérez apareceu en boca de gol e só tivo que empuxar o esférico á rede, rescatando un valioso punto 'in extremis' para o seu equipo.