Definido o primeiro escollo que deberá afrontar o Poio Pescamar na XXXII edición da Copa da Raíña. A Real Federación Española de Fútbol efectuou o sorteo este luns da segunda eliminatoria do torneo, na que xa entran os equipos da máxima categoría. No que respecta ao conxunto conserveiro, ten por diante dúas roldas para poder cumprir o obxectivo de estar na fase decisiva, a final a oito de Copa. No primeiro deles viaxará até a provincia de Cidade Real. O bombo deparou que o rival do Poio Pescamar sexa o Almagro FSF, equipo do grupo 3 da Segunda División que na rolda previa desfíxose do Salesianos Puertollano. O cruzamento, como é habitual no torneo, disputarase a partido único o día 23 ou 24 de setembro. Para o Poio Pescamar o duelo copeiro chegará nun momento óptimo, xa que se disputará entre dúas xornadas consecutivas de liga na casa. En concreto este sábado 20 de setembro o conxunto vermello recibirá na Seca o AD Ceuta (16.00 horas) e o día 28 fará o propio co Atlético Torcal (12.00 horas).