Axentes da Policía Local de Pontevedra detiveron unha muller por segunda vez como presunta autora dun delito contra a saúde pública tras interceptala nun operativo. A detención produciuse despois de que os efectivos establecesen un dispositivo de vixilancia específico na zona onde se detectara a actividade sospeitosa. A intervención iniciouse cando os axentes, en labores de patrulla, observaron como unha persoa circulaba co seu turismo cara unha rúa onde agardaba un home. Tras comprobar que se iniciaba unha conversa entre ambos e intercambiaban algún elemento de cor branca, a policía decidiu actuar. A condutora do vehículo xa era coñecida polo corpo de seguridade, xa que fora detida noutra ocasión por tráfico de drogas en outubro de 2023. Este antecedente motivou que os axentes intensificasen a súa vixilancia sobre as súas actividades. Nun primeiro momento, os axentes interceptaron o comprador, ao que se lle interveu unha bolsa de plástico transparente cunha substancia ilegal no seu interior, levantándose a correspondente acta de intervención. Tras unha primeira batida sen éxito na tarde do 4 de setembro, a Policía Local decidiu establecer un dispositivo de vixilancia ao día seguinte, o venres 5, na mesma zona. As sospeitas confirmaronse cando, nun determinado momento, a condutora apareceu de novo e un home que agardaba na zona subiu ao coche para realizar un intercambio. Nesta ocasión, os axentes interceptaron o vehículo na avenida de Lugo, onde entregaron a correspondente acta de intervención de drogas ao copiloto e procederon coa detención da condutora para trasladala ás dependencias policiais e poñela a disposición xudicial. Desde a Policía Local lembran a importancia da prevención no consumo e no tráfico de drogas dentro dos municipios, solicitando a colaboración cidadá ante posibles sospeitas.