ఏపీ ముఖ్యమంత్రి నారా చంద్రబాబు నాయుడు మనవడు, విద్యాశాఖ మంత్రి తనయుడు అరుదైన ఘనత సాధించారు. ఏకంగా వరల్డ్ రికార్డ్స్‌లో స్థానం సంపాదించారు. చెస్‌లో 175 కష్టమైన పజిల్స్‌ను వేగంగా పరిష్కరించి 'ఫాస్టెస్ట్ చెక్‌మేట్ సాల్వర్'గా వరల్డ్ బుక్ ఆఫ్ రికార్డ్స్‌లో స్థానం దక్కింది. లండన్‌లోని వెస్ట్ మినిస్టర్ హాల్‌లో జరిగిన కార్యక్రమంలో ఈ పురస్కారాన్ని అందుకున్నారు.. మంత్రి లోకేష్, ఆయన సతీమణి బ్రాహ్మణి ఈ వేడుకలో పాల్గొన్నారు. గతేడాది '5334 ప్రాబ్లమ్స్ అండ్ గేమ్స్' పుస్తకంలోని 175 కఠినమైన చెక్‌మేట్ పజిల్స్‌ను చాలా త్వరగా పూర్తి చేసిన సంగతి తెలిసిందే. ఈ పజిల్స్‌ వేగం, కచ్చితత్వం, ఆలోచించే సామర్థ్యాన్ని పరీక్షిస్తాయి. ఇలాంటి పజిల్స్‌ను వేగంగా పూర్తి చేయడం గొప్ప విషయం. దేవాన్ష్ గతంలోనే చెస్‌లో రెండు ప్రపంచ రికార్డులు సాధించారు. 7-డిస్క్ టవర్ ఆఫ్ హనోయిని కేవలం 1.43 సెకన్లలో పూర్తి చేశారు. అంతేకాదు, 9 చెస్ బోర్డులపై 32 పావులను 5 నిమిషాల్లో సరిగ్గా అమర్చారు. చిన్న వయసులోనే దేవాన్ష్ సత్తా చాటుతున్నారు. దేవాన్ష్ 'ఫాస్టెస్ట్ చెక్‌మేట్ సాల్వర్'గా వరల్డ్ బుక్ ఆఫ్ రికార్డ్స్ అవార్డు-2025 గెలుచుకున్న సందర్భంగా సీఎం చంద్రబాబు నాయుడు మనవడికి అభినందనలు తెలిపారు. 'దేవాన్ష్ అతి తక్కువ సమయంలో 175 చెక్‌మేట్ పజిల్స్‌ను పరిష్కరించి మా దేవాన్ష్ ఈ ఘనత సాధించారు. లండన్‌లో పురస్కారం అందుకున్నందుకు గర్విస్తున్నాను. కోచ్ మార్గదర్శకత్వంలో దేవాన్ష్ కొన్ని నెలల పాటు కష్టపడ్డారు.. అతని కృషి ఫలితంగానే ఈ విజయం సొంతమైంది. శుభాకాంక్షలు ఛాంపియన్' అంటూ ట్వీట్ చేశారు.'నా చిన్న ఛాంపియన్..నువ్వు మమ్మల్ని మరోసారి గర్వపడేలా చేశావు. చెక్‌మేట్ సాల్వర్‌గా ప్రపంచ రికార్డు సాధించడం గొప్ప విషయం. వేగవంతమైన చెక్‌మేట్ సాల్వర్‌గా ప్రపంచ రికార్డు నెలకొల్పడంలో నీ అంకితభావం, నిబద్ధత నన్ను నిజంగా ఆకట్టుకున్నాయి. ఈ విజయం నీ కృషికి తగిన ప్రతిఫలం. ఈ ప్రత్యేక సందర్భంలో నీతో ఇక్కడ ఉండటం సంతోషంగా ఉంది' అంటూ మంత్రి లోకేష్ ట్వీట్ చేశారు. నారా భువనేశ్వరి కూడా మనవడు దేవాన్ష్‌ని అభినందించారు. 'లండన్‌లోని వెస్ట్‌మినిస్టర్ హాల్‌లో వరల్డ్ బుక్ ఆఫ్ రికార్డ్స్ గౌరవం అందుకున్న నా ప్రియమైన మనవడు దేవాన్ష్‌‌కు నా ఆశీస్సులు. కేవలం 10 సంవత్సరాల వయసులో చెస్ పట్ల నీ ప్రతిభ, క్రమశిక్షణ, అంకితభావం మన కుటుంబానికి ఎంతో గర్వకారణం. దేవాన్ష్ మరింత ఎత్తుకు ఎదగాలి. నీవు ప్రకాశవంతంగా మరిన్ని మైలురాళ్లను సాధించాలని కోరుకుంటున్నాను' అన్నారు. నారా బ్రాహ్మణి తన కుమారుడు దేవాన్ష్‌ను ప్రశంసించారు. 'దేవాన్ష్.. నిన్ను చూసి చాలా గర్వంగా ఉంది. కేవలం 10 ఏళ్ల వయసులోనే నీ అంకితభావం, దృష్టి, చెస్ పట్ల ప్రేమ లండన్‌లోని వెస్ట్‌మినిస్టర్ హాల్‌లో నీకు వరల్డ్ బుక్ ఆఫ్ రికార్డ్స్ గౌరవాన్ని తెచ్చిపెట్టాయి. నీ ప్రతి కదలికలోనూ నీ కష్టం కనిపిస్తుంది. ఇది ప్రారంభం మాత్రమే.. పెద్ద కలలు కంటూ ఉండు, నా చాంప్' అంటూ ట్వీట్ చేశారు.