O que o goberno municipal quixo bautizar como 'Nadal riquiño' foi todo un éxito en Pontevedra. Así o defenderon este xoves desde o Concello. "Foron unhas festas espectaculares", subliñou a tenente de alcalde, Eva Vilaverde, que quixo facer balance de máis dun mes de programación festiva. A representante municipal sostivo que este éxito "podíase ver" no "dinamismo" que mostraron tanto as rúas da cidade como os comercios ou os establecementos de hostalaría. "Estaba cheo de xente en todas as zonas", asegurou. Todas as actividades organizadas no Recinto Feiral ou na Praza de España, con máis de 17.000 persoas en cada unha delas, esgotaron as quendas habilitadas. O mesmo ocorreu cos talleres que acolleu o mercado de abastos. Pista de xeo no nadal pontevedrésCristina Saiz "O que cabe é felicitarnos polo ben que estivo este Nadal riquiño", afirmou Eva Vilaverde, para quen esta aposta por unhas festas "especialmente locais" resultou ser un "auténtico éxito" de participación. Para a edil, este nadal pontevedrés "creo que se consolida", polo que avanzou que o goberno municipal seguirá traballando nesa liña de cara ao próximo ano. Ademais, Eva Vilaverde agradeceu aos cidadáns de Pontevedra e de toda a súa área de influencia pola súa "implicación" con estas festas. "Estamos moi contentos de como funcionou todo", sentenciou.