Latest Gold Silver Rates: అంతర్జాతీయంగా ఉద్రిక్త పరిస్థితులు నెలకొన్నప్పటికీ బంగారం ధర తగ్గుతూనే ఉంది. పెళ్లిళ్ల సీజన్‌లో బంగారం కొనాలనుకునే మహిళలకు ఇది శుభవార్త అని చెప్పొచ్చు. సాధారణంగా ఉద్రిక్త పరిస్థితుల నేపథ్యంలో సురక్షిత పెట్టుబడి సాధనంగా బంగారానికి డిమాండ్ ఉంటుంది. ఈ క్రమంలో అటువైపు పెట్టుబడులు పెరిగి ధర కూడా పెరగాల్సి ఉంటుంది. కానీ ఇప్పుడు అలా జరగట్లేదు. ఒకవైపు ఇరాన్ - ఇజ్రాయెల్ మధ్య భీకర యుద్ధం జరుగుతోంది. మధ్యలో అమెరికా కూడా ఇరాన్‌పై దాడి చేస్తుండగా.. ఇరాన్ వీటితో పాటు గల్ఫ్ దేశాలపైనా ప్రతిదాడులు నిర్వహిస్తోంది. అయితే . మార్చి 6న ఉదయం 8 గంటల సమయంలో కూడా బంగారం ధర తగ్గుముఖం పట్టింది. దేశీయంగా 22 క్యారెట్ల పసిడి ధర రూ. 1500 తగ్గగా.. తులం రూ. 1,49,300 వద్ద ఉంది. వరుసగా 4 రోజులుగా ధర తగ్గుతూనే వచ్చింది. దీనికి ముందు వరుసగా రూ. 2850, రూ. 2650, రూ. 2350 మేర పతనమైంది. ఇలా 4 రోజుల వ్యవధిలో 22 క్యారెట్ల పసిడి ధర రూ. 9350 తగ్గింది. 24 క్యారెట్ల గోల్డ్ రేటు రూ. 1630 తగ్గింది. ఇది ప్రస్తుతం 10 గ్రాములకు రూ. 1,62,880 వద్ద ఉండగా.. గత 4 రోజుల్లో ఇది రూ. 10,210 తగ్గుముఖం పట్టింది. బంగారం ధర వరుసగా పతనం అవుతున్నప్పటికీ.. మరోవైపు మాత్రం మార్చి 6న ఉదయం స్థిరంగానే ఉంది. ప్రస్తుతం హైదరాబాద్ నగరంలో కేజీకి రూ. 2.95 లక్షల వద్ద ఉంది. దీనికి ముందటి రోజు ఇది రూ. 20 వేలు తగ్గింది. మార్చి 2న కూడా రూ. 10 వేలు పతనమైంది. ఇక ఇంటర్నేషనల్ మార్కెట్లో చూసినట్లయితే కూడా బంగారం, వెండి ధరలు భారీ స్థాయిలో దిగొచ్చాయి. స్పాట్ గోల్డ్ రేటు ఔన్సుకు 5100 డాలర్ల స్థాయిలో ఉంది. కిందటి రోజు ఇది 5200 డాలర్ల మార్కు వద్ద ఉండేది. సిల్వర్ రేటు చూస్తే 83 డాలర్ల వద్ద ట్రేడవుతోంది. దీనికి అనుగుణంగా మార్చి 6న ఉదయం 10 గంటలకు బంగారం, వెండి ధరలు మారే అవకాశం ఉంది. బంగారం ధర పతనానికి కారణాలివే..అంతర్జాతీయంగా ఇలా ఉద్రిక్త పరిస్థితుల్లోనూ బంగారం ధర పతనం అయ్యేందుకు పలు కారణాలు ఉన్నాయి. ఇక్కడ ఇతర కరెన్సీలతో పోలిస్తే ప్రధానంగా యూఎస్ డాలర్ బలపడుతోంది. ఇది బంగారాన్ని ఆకర్షణ కోల్పోయేలా చేస్తోంది. ఇదే సమయంలో పెరుగుతున్న ద్రవ్యోల్బణం ఆందోళనలతో.. యూఎస్ ఫెడరల్ రిజర్వ్ సమీప భవిష్యత్తులో వడ్డీ రేట్లను తగ్గించబోదనే సంకేతాలు బలపడుతున్నాయి. ఫెడ్ వడ్డీ రేట్లను తగ్గిస్తేనే బంగారం ధర పెరుగుతుంటుంది. కానీ ప్రస్తుతం అలా జరగకపోవడంతో బంగారం ధర తగ్గుతున్నట్లు నిపుణులు భావిస్తున్నారు. ఇటీవల ఆల్ టైమ్ హై వద్ద గోల్డ్, సిల్వర్ క్రాష్ నేపథ్యంలో కూడా ప్రస్తుతం జనం ఆపద సమయంలో బంగారం కంటే క్యాష్ హోల్డింగ్స్‌పైనే దృష్టి సారిస్తున్నట్లు తెలుస్తోంది.