HDFC Bank Two Wheeler Loan: జీఎస్టీ సంస్కరణల నేపథ్యంలో.. చాలా వస్తువులు, ఉత్పత్తుల ధరలు తగ్గిన సంగతి తెలిసిందే. ముఖ్యంగా ద్విచక్రవాహనాలు, చిన్న కార్లపై జీఎస్టీ 28 శాతం నుంచి 18 శాతానికి దిగొచ్చింది. దీంతో ఇప్పటికే ఆయా తయారీ కంపెనీలు ఉన్నీ.. ఈ జీఎస్టీ రేట్ల కోత ప్రయోజనాల్ని పూర్తి మొత్తం కస్టమర్లకు బదిలీ చేస్తున్నట్లు ప్రకటించాయి. ఆయా మోడల్ బైక్స్, స్కూటీ, కార్ల ధరల్ని కూడా తగ్గించేశాయి. ఇంకా ఎలాగూ దీపావళి పండగ సీజన్ ఉండనే ఉంది. ఈ క్రమంలో అదనంగా ఆఫర్లు ప్రకటిస్తున్నాయి. దీంతో.. కొత్త ద్విచక్ర వాహనం కొనుగోలు చేయాలనుకునే వారికి ఇదే మంచి సమయంగా చెప్పొచ్చు.ఇప్పట్లో ప్రతి ఇంట్లోనూ మనం బైక్ లేదా స్కూటీ చూస్తూనే ఉంటాం. దీని అవసరం అంతలా పెరిగిపోయింది. బయటికి కిలోమీటర్ దూరం వెళ్లాలన్నా.. వేరే ఊరు వెళ్లాలన్నా.. దూరప్రాంతాలకు వెళ్లాలన్నా కూడా దీనిని ఉపయోగిస్తున్నారు. మీరు ఇప్పుడు బైక్ లేదా స్కూటీ కొనాలంటే.. బ్యాంకులు, ఇతర నాన్ బ్యాంకింగ్ ఫైనాన్షియల్ కంపెనీలు (NBFC) లోన్లు కూడా ఇస్తున్నాయి. ఇక్కడ బ్యాంక్ యాప్ లేదా వెబ్‌సైట్ ద్వారా అప్లై చేసుకోవచ్చు లేదా నేరుగా వెళ్లి సంప్రదించొచ్చు. లోన్ తీసుకునే ముందు.. అక్కడ వడ్డీ రేట్లు, వాహనం విలువలో లోన్ ఎంత వస్తుంది, ప్రాసెసింగ్ ఫీజులు, లేట్ ఫీ, ప్రీ పేమెంట్, ఫోర్ క్లోజర్ ఛార్జీలు, ఈఎంఐ, ఇతర నిబంధనలు అన్నీ ముందుగానే తెలుసుకోవాలి. చాలా బ్యాంకులు కూడా వాహనం వాల్యూలో కనీసం 80 శాతం నుంచి 90 శాతం వరకు లోన్ ఇస్తున్నాయి. కొన్ని ఇతర నిబంధనలు, షరతులతో 100 శాతం వరకు కూడా ఆఫర్ చేస్తున్నాయి. ఇక్కడ క్రెడిట్ స్కోరు చాలా కీలకం. 750 ఆపైన ఇలా మెరుగైన స్కోరు ఉన్నవారికి.. చాలా తక్కువ వడ్డీ రేటుకే లోన్ వస్తుందని చెప్పొచ్చు. ఇంకా వేగంగా లోన్ కూడా మంజూరవుతుంది. ప్రాసెసింగ్ ఫీజుల్లోనూ ఇక్కడ రాయితీ ఉండొచ్చు. >> దేశంలోని అతిపెద్ద ప్రభుత్వ రంగ బ్యాంక్.. స్టేట్ బ్యాంక్ ఆఫ్ ఇండియాలో ద్విచక్ర వాహనాల రుణాలపై వడ్డీ రేట్లు 12.85 శాతం నుంచి ప్రారంభమవుతున్నాయి. ఇక్కడ ప్రాసెసింగ్ ఫీజు లోన్ మొత్తంలో 2 శాతంగా ఉంది. హెచ్‌డీఎఫ్‌సీ బ్యాంకులో 14.50 శాతంగా ఉండగా.. ఇక్కడ రుణ మొత్తంలో 2.50 శాతం వరకు ప్రాసెసింగ్ ఫీజు పడుతుంది. ఐసీఐసీఐ బ్యాంకులో కాస్త తక్కువగా 10.50 శాతం వడ్డీ రేటుకే లోన్ వస్తుండగా.. ప్రాసెసింగ్ ఫీజు మాత్రం 4 శాతం వరకు ఉంది. ఐడీఎఫ్‌సీ ఫస్ట్ బ్యాంకులో చాలా తక్కువగా 8.50 శాతం నుంచి వడ్డీ రేట్లు ఉన్నాయి. ఇక్కడ ప్రాసెసింగ్ ఫీజు 5 శాతం వరకు ఉంది. బ్యాంక్ ఆఫ్ ఇండియాలో 8.75 శాతం నుంచి, బంధన్ బ్యాంకులో 9.47 శాతం నుంచి వడ్డీ పడుతుంది. పంజాబ్ నేషనల్ బ్యాంకులో 10.75 శాతం, యాక్సిస్ బ్యాంకులో 10.50 శాతం నుంచి వడ్డీ రేట్లు ఉన్నాయి. ఇక్కడ ఇవన్నీ అత్యల్ప, ప్రారంభ వడ్డీ రేట్లు మాత్రమే. ఇంకా మీ వయసు, క్రెడిట్ స్కోరు, ఆదాయం, లోన్ తీసుకునే వారి అర్హతలు/అవసరాల్ని బట్టి వడ్డీ రేట్లలో మార్పులు ఉంటాయని గమనించాలి.