Un home de 75 anos, veciño de Caldas de Reis, faleceu este venres na parroquia de Saiar tras sufrir un accidente mentres conducía un motocultor por unha pista veciñal no lugar de Cardín. O servizo de emerxencias 112 Galicia recibiu o aviso ao redor das 13:30 horas, tras ser alertado polo 061. Segundo informaron, unha muller que pasaba pola zona atopou ao home tendido no chan cun forte golpe na cabeza e avisou inmediatamente aos servizos de emerxencia. Até o lugar desprazáronse efectivos sanitarios do 061, así como axentes da Garda Civil e a Policía Local. A pesar dos intentos de reanimación, os servizos médicos non puideron salvar a vida do home. Polo momento, descoñécense as causas que provocaron que a vítima perdese o control do motocultor, o que desencadeou o tráxico suceso. As autoridades abriron unha investigación para esclarecer as circunstancias do accidente.