A Área Sanitaria de Pontevedra e O Salnés estableceu durante o primeiro semestre de 2025 a súa posición como unha das de menores demoras asistenciais do Sistema Sanitario Público galego, segundo revelan os datos oficiais do Servizo Galego de Saúde (Sergas) Os profesionais, segundo indican desde a xerencia da área, conseguiron moderar os tempos de espera para intervencións cirúrxicas, consultas de especialidade e probas diagnósticas, mantendo unha tendencia descendente nos atrasos na atención. No ámbito cirúrxico, a área sanitaria rexistrou unha demora media de 58,5 días para unha intervención, cifra que se sitúa 11 días por debaixo da media do Sergas (69,3 días). Esta redución reflíctese de forma diferenciada nos dous centros: o Complexo Hospitalario Universitario de Pontevedra (CHUP) alcanza os 61 días de espera media, mentres que o Hospital do Salnés baixa ata os 44,7 días. As especialidades cirúrxicas con mellores rexistros foron Dermatoloxía e Xinecoloxía en ambos centros. No complexo pontevedrés, estas disciplinas presentaron demoras de 30,5 e 37,4 días respectivamente, mentres que no Salnés os tempos reduciúronse ata os 15,6 e 17 días. Pola contra, as maiores demoras corresponden a Otorrinolaringoloxía e Anxioloxía/Cirurxía Vascular no CHUP (69 e 75,9 días), e a Cirurxía xeral e Otorrinolaringoloxía no Salnés (61 e 70,2 días). Especialmente significativa resulta a xestión dos casos máis urxentes, clasificados como Prioridade 1, que rexistran unha espera media de 11,8 días na área sanitaria. Esta cifra cumpre amplamente co compromiso do sistema público galego de atender aos pacientes máis graves en menos de 30 días, segundo a xerencia. ESPECIALIDADE Nas consultas de especialidade, a demora media alcanza os 61,8 días, situándose 4 días por debaixo da media do Sergas (57,3 días). O Complexo de Pontevedra presenta 62,3 días de espera fronte aos 60,3 días do Hospital do Salnés. Os servizos con menor demora son Anestesia, Oncoloxía, Cardioloxía, Nefroloxía e Endocrinoloxía, todos con prazos inferiores aos 11 días no CHUP e aos 15 días no Salnés. As maiores esperas concéntranse en Neuroloxía, Dermatoloxía, Traumatoloxía e Uroloxía, que superan os 60 días. No capítulo de probas diagnósticas, os tempos medios para Radiodiagnóstico alcanzan os 40,7 días na área sanitaria, con diferenzas notables entre centros: 25,4 días no CHUP e 60,9 no Salnés. Para TAC, a espera media é de 63,1 días (25,7 no Complexo e 74,8 no Salnés), mentres que a Resonancia Magnética require 48,8 días de media (38,1 en Pontevedra e 56,1 no Salnés). As endoscopias presentan unha demora media de 45 días na área sanitaria, con 47,4 días en Pontevedra e 29,4 no Salnés. Finalmente, as probas electrofisiolóxicas rexistran os tempos máis baixos, con 27,2 días de espera media.