ఆస్ట్రేలియా టూర్‌కు సిద్ధమవడంతో.. ఆసీస్ కూడా తన గేమ్ ప్లాన్ రెడీ చేసింది. ప్యాట్ కమిన్స్ దూరం కావడంతో , జోష్ హేజిల్‌వుడ్‌ని టీమ్‌లోకి తీసుకుని టీమిండియాకు గట్టి పోటీ ఇచ్చేందుకు సిద్ధమైంది. మిచెల్ మార్ష్ నాయకత్వంలో ఆస్ట్రేలియా క్రికెట్ బోర్డును వన్డే, టీ20లకు స్క్వాడ్‌ను ప్రకటించింది. విరాట్, రోహిత్‌లకు గతంలోనే కఠిన సవాళ్లు విసిరిన స్టార్క్ - హేజిల్‌వుడ్ జోడీ తిరిగి రావడం ఈ సారి పోరును మరింత ఉత్కంఠభరితంగా మార్చనుంది. ఆస్ట్రేలియా వేదికగా జరగనున్న మూడు వన్డేలు, ఐదు టీ20లు ప్రేక్షకులను ఆకట్టుకునేలా ఉండబోతున్నాయని క్రికెట్ ఆస్ట్రేలియా అంచనా వేస్తోంది. ఈ మూడు వన్డేలు పెర్త్, అడిలైడ్, సిడ్నీల్లో జరుగుతాయి. టీ20లు కాన్బెరా, మెల్‌బోర్న్, హోబార్ట్, గోల్డ్‌కోస్ట్, బ్రిస్బేన్ వేదికలపై ఆడతారు.ఇక ఆసీస్ బ్యాటర్ మాథ్యూ రెన్షా రెండు సంవత్సరాల విరామం తర్వాత వన్డే జట్టులోకి వచ్చాడు. ఇటీవల ఆస్ట్రేలియా ఏ తరఫున, అలాగే క్వీన్స్‌ల్యాండ్ తరఫున చేసిన పరుగుల అతనికి ఈ అవకాశం తెచ్చిపెట్టింది. అదే సమయంలో అలెక్స్ కెరీ మొదటి వన్డేలో ఆడటం లేదని తెలుస్తోంది. ఎందుకంటే అతను షెఫీల్డ్ షీల్డ్ క్రికెట్ రెండో రౌండ్‌లో పాల్గొననున్నాడు.జోష్ ఇంగ్లిస్ చిన్న గాయంతో దూరంగా ఉన్న తర్వాత తిరిగి టీ20 జట్టులో చోటు దక్కించుకున్నాడు. నాథన్ ఎలిస్ తనకు బిడ్డ పుట్టడంతో బ్రేక్ తీసుకున్న తర్వాత మళ్లీ అందుబాటులోకి వచ్చాడు. గ్లెన్ మ్యాక్స్‌వెల్ మాత్రం న్యూజిలాండ్ పర్యటనలో మణికట్టు విరగడంతో తొలి రెండు టీ20లకు దూరంగా ఉంటాడు. కామెరాన్ గ్రీన్ వన్డే సిరీస్ తర్వాత టెస్ట్ సీజన్‌ సిద్ధత కోసం వెస్టర్న్ ఆస్ట్రేలియా తరఫున కొనసాగుతాడు. గాయం కారణంగా దూరమైన ప్యాట్ కమిన్స్ టీమిండియా సిరీస్‌కు దూరం కానుండగా.. నవంబర్ 21న ప్రారంభమయ్యే యాషెస్ సిరీస్‌కు అందుబాటులో ఉండనున్నాడు.సెలక్షన్ కమిటీ ఛైర్మన్ జార్జ్ బెయిలీ మాట్లాడుతూ “ఈ సిరీస్‌ తరువాత షెఫీల్డ్ షీల్డ్‌ క్రికెట్ మ్యాచ్‌లు కూడా ఉన్నందున, ఆటగాళ్ల వర్క్‌లోడ్‌ దృష్టిలో పెట్టుకుని జట్టు ఎంపిక చేశాం. టీ20 జట్టును ప్రధానంగా కొనసాగిస్తూ, వచ్చే ఏడాది వరల్డ్‌కప్‌కు సరైన ప్రిపరేషన్‌ సాధించడం లక్ష్యం” అని తెలిపాడు. ఆస్ట్రేలియా వన్డే జట్టుమిచెల్ మార్ష్ (కెప్టెన్), జేవియర్ బార్ట్‌లెట్, అలెక్స్ క్యారీ, కూపర్ కానోలీ, బెన్ ద్వార్ష్యూస్, నాథన్ ఎలిస్, కామెరాన్ గ్రీన్, జోష్ హేజిల్‌వుడ్, ట్రావిస్ హెడ్, జోష్ ఇంగ్లిస్, మిచెల్ ఓవెన్, మాథ్యూ రెన్షా, మాథ్యూ షార్ట్, మిచెల్ స్టార్‌క్, ఆడమ్ జాంపా.టీ20 జట్టు (మొదటి రెండు మ్యాచ్‌లకు)మిచెల్ మార్ష్ (కెప్టెన్), సీన్ అబాట్, జేవియర్ బార్ట్‌లెట్, టిమ్ డేవిడ్, బెన్ ద్వార్ష్యూస్, నాథన్ ఎలిస్, జోష్ హేజిల్‌వుడ్, ట్రావిస్ హెడ్, జోష్ ఇంగ్లిస్, మాథ్యూ కూహ్నెమన్, మిచెల్ ఓవెన్, మాథ్యూ షార్ట్, మార్కస్ స్టాయినిస్, ఆడమ్ జాంపా.