: మన దేశంలో నిర్దిష్ట ఆదాయానికి మించి సంపాదించిన వారు.. చట్టంలోని పాత లేదా కొత్త పన్ను విధానాల కింద.. పన్ను చెల్లించాల్సి ఉంటుంది. ఇది టాక్స్ శ్లాబులపై ఆధారపడి ఉంటుంది. ప్రతి ఆర్థిక సంవత్సరం ముగిసిన తర్వాత.. ఐటీ రిటర్న్స్ ఫైల్ చేయాల్సి ఉంటుంది. 2024-25 ఆర్థిక సంవత్సరానికి సంపాదించిన ఆదాయంపై.. ఈ ఆర్థిక సంవత్సరంలో లేదా 2025-26 మదింపు సంవత్సరంలో (అసెస్‌మెంట్ ఇయర్) ఫైల్ చేయాలి. అయితే.. ఐటీఆర్ ఫైలింగ్ ఏప్రిల్ 1న ప్రారంభం కాగా.. గడువు 2025, సెప్టెంబర్ 16తోనే ముగిసింది. ఆడిట్ అవసరం లేని ఐటీఆర్‌కు ఈ గడువు ఉంది. అయితే డెడ్‌లైన్‌కు చాలా రోజుల ముందుగానే కోసం ఇంకా ఎదురుచూస్తున్నారు. వాస్తవంగా చెల్లించాల్సిన దాని కంటే ఎక్కువ పన్ను చెల్లించిన వారికి.. అన్ని లెక్కలు చూసుకొని ఆదాయపు పన్ను శాఖ ఎక్కువ చెల్లించిన మొత్తాన్ని తిరిగి టాక్స్ పేయర్ అకౌంట్లో జమ చేస్తుంది. అంటే.. ఇక్కడ మినహాయింపులు, తగ్గింపులు, టీడీఎస్ వంటి వాటి గురించి సరిగా తెలియక టాక్స్ కట్టిన వారికి.. పన్ను ఇంకా ఎక్కువ పడొచ్చు లేదా తక్కువ పడొచ్చు. దీనిని ఆదాయపు పన్ను శాఖ సమీక్షించి.. ఎక్కువ కడితే రిఫండ్ ఇస్తుంది. సాధారణంగా ఇది ఐటీఆర్ ఫైల్ చేశాక.. 30-45 రోజుల్లో అకౌంట్లో పడాల్సి ఉంటుంది. కానీ ఈసారి ఇంకా చాలా మంది.. అంతకంటే ఎక్కువ కాలం నుంచే ఎదురుచూస్తున్నారు. డబ్బులు ఎప్పుడు పడతాయా అని చూస్తున్నారు. కేంద్ర ప్రత్యక్ష పన్నుల బోర్డు (CBDT) ఛైర్మన్ రవి అగర్వాల్.. దీని గురించి స్పందించారు. కొన్ని కేసుల్లో పన్ను చెల్లింపుదారులు తప్పుడు మార్గాల్లో మినహాయింపులు పొందుతున్నారని.. వీటిని సమీక్షించి ప్రాసెసింగ్ చేయడంలో ఆలస్యం జరుగుతుందని అన్నారు. టాక్స్ పేయర్లు.. ఏమైనా సమాచారం రిటర్నుల్లో పేర్కొనకపోతే.. వారిని రివైజ్డ్ రిటర్న్స్ సమర్పించాలని కోరుతున్నట్లు.. వారికి నోటీసులు పంపుతున్నట్లు స్పష్టం చేశారు. ఇలాంటి సందర్భాల్లో రిఫండ్ ఆలస్యం అవుతుందని చెప్పుకొచ్చారు. ఈ సందర్భంగానే.. అకౌంట్లో ఎప్పుడు పడుతుందో కూడా వివరించారు రవి అగర్వాల్. 'తక్కువ మొత్తంలో ఉండే టాక్స్ రిఫండ్ ఇప్పటికే విడుదల చేశాం. మేం ఇదే సమయంలో తప్పుడు రిఫండ్స్, తగ్గింపులు క్లెయిమ్ చేసిన వారిని గుర్తించే ప్రక్రియలో ఉన్నాం. చాలా వాటిని కనుగొన్నాం. ఇదో నిరంతర ప్రక్రియ. మిగతా వారికి పన్ను రిఫండ్స్ ఈ నెలలో లేదా డిసెంబరులో పడతాయని ఆశిస్తున్నాం.' అని చెప్పారు. ఇన్‌కంటాక్స్ ఇ- ఫైలింగ్ పోర్టల్‌లో టాక్స్ రిఫండ్ స్టేటస్ కూడా తెలుసుకోవచ్చు. అక్కడ యూజర్ ఐడీ, పాస్‌వర్డ్ ద్వారా లాగిన్ చేయాల్సి ఉంటుంది. ఇ- ఫైల్ ట్యాబ్‌లోకి వెళ్లి.. ఇన్‌కంటాక్స్ రిటర్న్స్ దానిపై క్లిక్ చేసి అక్కడ వ్యూ ఫైల్డ్ రిటర్న్స్ దానిపై క్లిక్ చేయాలి. అక్కడ సరైన అసెస్‌మెంట్ ఇయర్ సెలక్ట్ చేసుకొని.. రిఫండ్ స్టేటస్ చెక్ చేసుకోవచ్చు. అక్కడ రిఫండ్ జారీ అయిందని.. రిఫండ్ కొంత మొత్తం వచ్చిందని లేదా పూర్తి రిఫండ్ వచ్చిందని.. రిఫండ్ ఫెయిల్ అని ఇలా స్టేటస్ కనిపిస్తుంది.