బిగ్ బాస్ హౌస్‌లో ఫ్యామిలీ వీక్ వచ్చేసింది. ఈ ఫ్యామిలీ వీక్ ఎపిసోడ్‌లో ఎమోషన్స్ మామూలుగా ఉండవు. వాళ్లలో దాగిన సావిత్రి, ఎన్టీఆర్, ఏఎన్నార్, ఎస్వీరంగారావులంతా బయటకు వచ్చేస్తుంటారు. ఇక ఏదైనా సరే తనూజతోనే మొదలు.. తనూజతోనే ఎండ్ కాబట్టి.. ఈ ఫ్యామిలీ వీక్ ఎపిసోడ్ కూడా తనూజతోనే మొదలైంది. మొదటి హౌస్‌లోకి ఢమాల్ (డెమాన్) పవన్ తల్లి అడుగుపెట్టినా.. ప్రోమో మాత్రం తన దత్త పుత్రిక తనూజదే వదిలాడు బిగ్ బాస్. ఇక అసలే సావిత్రి కూతురు.. అందులోనూ ఫ్యామిలీ వీక్ ఎపిసోడ్ అంటే పెర్ఫామెన్స్ ఏ రేంజ్‌లో ఉంటుందో ఊహించుకోవచ్చు. ‘కుటుంబం మన తోడు ఉంటే.. ప్రపంచాన్ని గెలిచే శక్తి వచ్చినట్టే.. ఇది ఆ శక్తిని పొందే సమయం’ అంటూ తనూజ అక్క కూతురు, తనూజ సిస్టర్‌ని హౌస్‌లోకి పంపించారు. పాప అయితే భలే క్యూట్‌గా ఉంది. అమ్మ అని అను అనగానే.. ఆ చిన్నారి అమ్మా అని పిలిచింది. ఇంతలో తనూజ సిస్టర్ అనూజ హౌస్‌లోకి వచ్చింది. పెళ్లి కూతురు ఇదిగో పెళ్లి కూతురు అని తనూజ సిస్టర్‌ని హౌస్‌కి పరిచయం చేసింది. నువ్వు ఎక్కువ ఏడొద్దు అని చెప్పింది తనూజ సిస్టర్. ఆ తరువాత తన పెళ్లి శుభలేఖని తనూజకి ఇచ్చిందామె. ఆ తరువాత తన చేతులతో పెళ్లి కూతుర్ని చేసింది తనూజ. కాళ్లు మొక్కి ఆశీర్వాదం అందుకుంది తనూజ సిస్టర్. మొత్తంగా బిగ్ బాస్ అయితే గట్టిగానే ప్లాన్ చేశాడు. బిగ్ బాస్ హౌస్‌లో సీమంతాలు చేయడం.. పెళ్లి కూతుళ్లని చేయడం లాంటివి కొత్తేం కాదు. చాలా టీవీ షోలలో చేసేదాన్ని ఇక్కడ కూడా చేస్తుంటారు. గత సీజన్లలో కూడా ఇలాగే చేశారు. సింగర్ రేవంత్ భార్య సీమంతం కూడా అప్పట్లో ఇలాగే చేశారు. ఇక ఫ్యామిలీ వీక్‌లో భాగంగా.. ఫస్ట్ ప్రోమో తనూజది రావడం రకరకాల చర్చలకు దారితీస్తోంది. ఇప్పటికే బిగ్ బాస్ టైటిల్ ఆల్రెడీ తనూజకి ఇవ్వడానికి ఫిక్స్ అయిపోయిందని.. ఏదో జరిపించాలి కాబట్టి జరిపిస్తున్నారు కానీ.. ట్రోఫీ ఆమెకి ఇవ్వడానికి ఎప్పుడో ఒప్పందం కుదిరిందని.. అందుకే ఆమెకి సంబంధించిన నెగిటివ్ ఫుటేజ్ ఎక్కడా బయటకు రాకుండా బిగ్ బాస్ టీం జాగ్రత్తపడుతుందనే ప్రచారం నడుస్తోంది. దానికి తగ్గట్టుగానే వీకెండ్ నాగార్జున హోస్టింగ్ ఉంటుంది. ఇప్పటి వరకూ బిగ్ బాస్ హిస్టరీతో.. హోస్ట్ చేసింది తప్పు అన్న కంటెస్టెంట్ లేరు. కానీ ఆదివారం నాటి ఎపిసోడ్‌లో తనూజ కోసమే ఓడిపోయావా? అని నాగార్జున అన్న మాటకి.. ‘నేను కష్టపడి గెలిచాను సార్.. కానీ మీరు కళ్యాణ్ నాకోసం ఓడిపోయాడు అని అన్నారు’ అంటూ నిలదీసింది తనూజ. ఇదే మాట వేరే వాళ్లు అని ఉంటే ఆయన రియాక్షన్ మరో విధంగా ఉండేదేమో కానీ.. అక్కడున్నది అన్నపూర్ణ స్టుడియోస్ స్కూల్ తనూజ కాబట్టి.. బుజ్జగిస్తూ మాట్లాడారు నాగార్జున. ఇప్పుడు ఫ్యామిలీ వీక్‌లో భాగంగా.. తనూజ ప్రోమో ఫస్ట్ రావడంతో ఆమెకే టైటిల్ ఇస్తారనే వాదనలకు బలం చేకూరింది.