IPO Listing: ప్రముఖ ఎడ్‌టెక్ యూనికార్న్ సంస్థ ఫిజిక్స్ వాలా (Physics Wallah IPO Listing) అదరగొట్టింది. ఈ కంపెనీ షేర్లు మంగళవారం దేశీయ స్టాక్ మార్కెట్‌లో లిస్ట్ అయ్యాయి. ఎంట్రీలోనే అదరగొట్టాయి. ఏకంగా 33 శాతం ప్రీమియంతో లిస్టింగ్ అయ్యాయి. ఈ ఐపీఓ ధర రూ. 109తో పోలిస్తే జాతీయ స్టాక్ ఎక్స్ఛేంజీ ఎన్ఎస్ఈలో ఈ స్టాక్ రూ. 145 వద్ద ట్రేడింగ్ మొదలు పెట్టింది. ఇక బాంబే స్టాక్ ఎక్స్ఛేంజ్ బీఎస్ఈలో రూ. 143.10 వద్ద లిస్టింగ్ అయింది.ఆ తర్వాత కూడా రాణిస్తోంది. మరి ఈ ఐపీఓ ప్రైస్ బ్యాండ్, లిస్టింగ్ సహా పూర్తి వివరాలు తెలుసుకుందాం. ఫిజిక్స్‌వాలా ఐపీఓకు బిడ్డింగ్ తొలి రోజున ఆదరణ అంతంత మాత్రంగానే ఉంది. అయితే చివరి రోజు మాత్రం ఇన్వెస్టర్ల నుంచి అనూహ్య స్పందన కనిపించింది. ఈ పబ్లిక్ ఇష్యూలో భాగంగా 18,62,04,143 షేర్లు ఆఫర్ చేశారు. అయితే, ఏకంగా 33,62,27,044 షేర్లకు బిడ్లు వచ్చాయి. రూ. 3480 కోట్లు సమీకరించే లక్ష్యంతో ఈ పబ్లిక్ ఇష్యూ వచ్చింది. ఇందులో ఒక్కో షేరుకు ప్రైస్ బ్యాండ్ రూ. 103- 109గా నిర్ణయించారు. ఈ ఐపీఓలో రూ. 3100 కోట్లు విలువైన ఫ్రెష్ షేర్లు జారీ చేయగా రూ. 380 కోట్లు విలువైన ఆఫర్ ఫర్ సేల్ ద్వారా ప్రమోటర్లు తమ వాటాను విక్రయించారు. వరుస లాభాలకు బ్రేక్ పడింది. ఇన్వెస్టర్లు లాభాల స్వీకరణకు మొగ్గు చూపిన క్రమంలో వరుస లాభాలకు కళ్లెం పడినట్లయింది. మధ్యాహ్నం 1 గంటల సమయంలో సెన్సెక్స్ 177 పాయింట్ల నష్టంతో 84,773 పాయింట్ల వద్ద ట్రేడవుతోంది. ఇక నిఫ్టీ 50 ఇండెక్స్ 70 పాయింట్లు కోల్పోయి 25,943 పాయింట్ల వద్ద కొనసాగుతోంది. నిఫ్టీ బ్యాంక్ సూచీ మాత్రం 22 పాయింట్ల లాభంతో 58,985 పాయింట్ల వద్ద ట్రేడవుతోంది. ఇక నిఫ్టీ మిడ్ క్యాప్ 100 ఇండెక్స్ 260 పాయింట్ల మేర కోల్పోయింది. అంతర్జాతీయ మార్కెట్ల నుంచి వచ్చిన ప్రతికూల సంకేతాల ప్రభావం దేశీయ మార్కెట్ సూచీలపై స్పష్టంగా కనిపించింది. సోమవారం అమెరికా మార్కెట్లు నష్టాల్లో ముగిశాయి. ఆసియా మార్కెట్లలోనూ మిశ్రమ ఫలితాలు ఉన్నాయి. దీంతో దేశీయంగా మదుపరులు అప్రమత్తంగా వ్యవహరిస్తున్నారు. దీంతో కీలక రంగాల్లోని దిగ్గజ కంపెనీల షేర్లు అమ్మకాల ఒత్తిడికి గురవుతున్నాయి.