Gold price: దేశీయంగా బంగారం ధరలు వరుసగా దిగొస్తున్నాయి. అంతర్జాతీయ మార్కెట్లో ధరలను అనుసరించి దేశీయంగానూ పసిడి ధరలు తగ్గుముఖం పట్టాయి. మంగళవారం మధ్యాహ్నం 12 గంటల సమయంలో హైదరాబాద్ బులియన్ మార్కెట్లో ధరలు పరిశీలిస్తే 24 క్యారెట్ల మేలిమి బంగారం రేటు 10 గ్రాములకు రూ.1.25 లక్షల వద్ద ఉంది. అదే సమయంలో 22 క్యారెట్ల బంగారం రేటు రూ.1.14 లక్షల వద్ద కొనసాగుతోంది. వెండి రేటు సైతం భారీగానే తగ్గింది. కిలో వెండి రేటు రూ.1,56,000 వద్ద ట్రేడవుతోంది. ఈనెల 13వ తేదీన 10 గ్రాముల బంగారం ధర రూ.1.30 లక్షల వద్ద ఉండగా ఐదు రోజుల వ్యవధిలోనే రూ.5000 మేర తగ్గింది. వెండి ధర కిలోకు రూ.1.70 లక్షలుగా ఉండగా అప్పటితో పోలిస్తే దాదాపురూ.15 వేల మేర తగ్గింది. ఆ సమయంలో అంతర్జాతీయ మార్కెట్లో ఔన్స్ గోల్డ్ రేటు 4200 డాలర్ల వద్ద ఉండగా ఇప్పుడు అది 4010 డాలర్ల స్థాయికి పడిపోయింది. వెండి ధర ప్రస్తుతం ఔన్స్ 49 డాలర్ల వద్ద ట్రేడవుతోంది. ఈ ధరలను అనుసరించి దేశీయంగానూ ధరలు తగ్గుతున్నాయి. బంగారం ధరలు ఇంకా తగ్గుతాయా?అమెరికా కేంద్ర బ్యాంక్ ఫెడరల్ రిజర్వ్ వడ్డీ రేట్లు పెంచినప్పుడు బంగారం ధర పడుతుంది. వడ్డీ రేట్లు తగ్గినప్పుడు పెరుగుతుంది. ఈ నేపథ్యంలో ప్రస్తుతం అమెరికా డాలర్ విలువ పెరుగుతుండడం, వచ్చే నెల ఫెడ్ వడ్డీ రేట్లు తగ్గిస్తారన్న అంచనాలు క్షీణించడంతో పసిడికి డిమాండ్ తగ్గుతోంది. దీనికి తోడు డాలర్ ఇండెక్స్ బలపడడమూ మరో కారణమని విశ్లేషకులు పేర్కొంటున్నారు. అమెరికా ప్రభుత్వ షట్‌డౌన్ ముగిసిన క్రమంలో కీలక ఆర్థిక డేటా ఈ వారం వెలువడుతుంది. ఫెడ్ గత మీటింగ్‌కు సంబంధించిన మినిట్స్, సెప్టెంబర్ నెల ఉద్యోగాల డేటా ఈ బుధ, గురువారాల్లో వెలువడే అవకాశం ఉంది. ఈ డేటా ఫెడ్ వడ్డీ రేట్ల నిర్ణయాన్ని, బంగారం ధరలను ప్రభావితం చేస్తుంది. వాస్తవానికి వచ్చే నెలలో మరోసారి వడ్డీ రేట్లు తగ్గిస్తారని తొలుత అంచనాలు ఉన్నాయి. అయితే, ఫెడ్ అధికారులు మాత్రం ఈ వాదనలను తొసిపుచ్చారు. అంటే వడ్డీ రేట్ల తగ్గింపు ఉండకపోవచ్చు. ఒక వేళ ఫెడ్ వడ్డీ రేట్లను పెంచితే బంగారం ధరలు తగ్గే అవకాశం ఉంటుందని విశ్లేషకులు చెబుతున్నారు.