بنکاک : تھائی لینڈ میں کرین مسافر ٹرین پر گرنے سے 29 افراد ہلاک ہو گئے جبکہ حادثے میں 64 سے زائد افراد زخمی ہوئے۔تفصیلات کے مطابق تھائی لینڈ میں چین کی معاونت سے بننے والے ہائی اسپیڈ ریل منصوبے پر کام کر رہی ایک کرین مسافر ٹرین پر گرنے سے حادثے کا شکار ہو گئی، جس کے نتیجے میں کم از کم 29 افراد جاں بحق اور 64 سے زائد زخمی ہوگئے۔ حکام نے بتایا کہ واقعہ صبح تقریباً 9 بجے پیش آیا، کرین ریلوے ٹریک پر گری، جس سے ٹرین ٹکرا گئی، حادثے میں کئی بوگیاں پٹری سے اترگئیں اور ٹرین میں آگ لگ گئی تاہم حادثے میں زخمیوں کو فوری طور پر قریبی اسپتال منتقل کیا گیا۔پبلک ریلیشنز ڈیپارٹمنٹ نے کہا کہ حادثہ پیش آنے کے بعد ریسکیو ٹیمیں موقع پر پہنچ گئیں،مقامی میڈیا کی لائیو فوٹیج میں دیکھایا گیا کہ ٹرین اپنی طرف سے الٹی حالت میں پٹری سے اتر گئی اور دھواں اٹھ رہا تھا۔ ٹرین بانکوک سے اوبن رچاتانی صوبے جا رہی تھی اور اس میں 195 مسافر سوار تھے۔تھائی لینڈ کے ٹرانسپورٹ وزیر ففہت رچاکٹ پرکارن نے کہا کہ حکام مرحلہ وار جاں بحق افراد کی شناخت کر رہے ہیں۔یہ کرین چین کی معاونت سے چلنے والے 5.4 ارب ڈالر کے ہائی اسپیڈ ریل منصوبے پر استعمال ہو رہی تھی، جو بانکوک کو لاوس کے ذریعے چین کے کن منگ شہر سے جوڑے گا اور 2028 تک مکمل ہونے کا ہدف ہے۔تھائی لینڈ میں صنعتی اور تعمیراتی حادثات عام ہیں، جہاں حفاظتی قوانین پر عمل درآمد کمزور ہونے کی وجہ سے مہلک واقعات پیش آتے ہیں۔