Repo Rate: రిజర్వ్ బ్యాంక్ ఆఫ్ ఇండియా (RBI) గత సంవత్సరం.. లోన్లు తీసుకున్న వారికి.. కొత్తగా లోన్లు తీసుకునే వారికి అదిరిపోయే శుభవార్తలు అందించిన సంగతి తెలిసిందే. ఇక్కడ ముఖ్యంగా రెపో రేటును వరుస సమీక్షల్లో తగ్గిస్తూ వచ్చింది. ఏడాదిలో 10 నెలల వ్యవధిలోనే రికార్డు స్థాయిలో 125 బేసిస్ పాయింట్ల మేర రెపో రేటులో కోత విధించింది. అంటే 1.25 శాతం వరకు తగ్గిందని చెప్పొచ్చు. 2025 ఏడాది ప్రారంభంలో రెపో రేటు 6.50 శాతం వద్ద ఉండగా.. ఇది చివరికి చూస్తే 5.25 శాతానికి దిగొచ్చింది. దీంతో అంతకుముందు ఫ్లోటింగ్ రేటుపై లోన్లు తీసుకున్న వారికి ఈఎంఐ భారం తగ్గింది. ఇంకా టెన్యూర్ తగ్గించుకునే వెసులుబాటు కలగడంతో మొత్తం చెల్లించాల్సిన వడ్డీ భారం కూడా తగ్గింది. కొత్తగా లోన్లు తీసుకున్న వారికి తక్కువ వడ్డీ రేటుకే లోన్లు అందుబాటులోకి వచ్చాయి. తొలుత ఫిబ్రవరిలో రెపో రేటును ఆర్బీఐ 25 బేసిస్ పాయింట్ల మేర తగ్గించింది. ఆ తర్వాత మళ్లీ ఏప్రిల్ నెలలోనూ 25 బేసిస్ పాయింట్ల కోత విధించింది. జూన్ నెలలో ద్రవ్యోల్బణం భారీగా దిగొచ్చిన నేపథ్యంలో ఈసారి 50 బేసిస్ పాయింట్లను తగ్గించింది. . వడ్డీ రేట్లు గణనీయంగా తగ్గుముఖం పట్టాయి. దీంతో లోన్లు తీసుకునే వారు ఊపిరి పీల్చుకున్నారు. అయితే 2026 సంవత్సరంలో మాత్రం ఆర్బీఐ నిరాశనే మిగల్చనున్నట్లు తెలుస్తోంది. ఇప్పుడు ఫిబ్రవరిలో ఆర్బీఐ ద్రవ్య పరపతి విధాన సమీక్ష జరగనుండగా.. ఈసారి రెపో రేట్లలో మార్పులు ఉండకపోవచ్చని ఆర్థిక నిపుణులు అంచనా వేస్తున్నారు. అంటే రెపో రేటు ప్రస్తుతం ఉన్న 5.25 శాతం వద్దే స్థిరంగా ఉండనున్నట్లు తెలుస్తోంది. ఇదే జరిగితే బ్యాంకులు లోన్ వడ్డీ రేట్లు తగ్గించకపోగా.. మరింత పెంచే అవకాశాలు ఉన్నాయని పేర్కొంటున్నారు. ఈసారి ఆర్బీఐ ఎంపీసీ సమావేశం ఫిబ్రవరి 4-6 తేదీల్లో జరగనుంది. ఇది కేంద్ర ప్రభుత్వం వార్షిక బడ్జెట్‌ను ప్రవేశపెట్టిన తర్వాత 5 రోజుల్లోనే వస్తుందని చెప్పొచ్చు. ఇటీవలి కాలంలో రిటైల్ ద్రవ్యోల్బణం కాస్త పెరుగుతుండటంతో ఆర్బీఐ తన నిర్ణయాన్ని మార్చుకోనున్నట్లు తెలుస్తోంది. అంతకుముందు ద్రవ్యోల్బణం వరుసగా తగ్గి ఆల్ టైమ్ కనిష్ఠ స్థాయిలకు కూడా పడిపోయిన సంగతి తెలిసిందే. ఇప్పుడు డిసెంబరులో కాస్త పెరిగింది. నాలుగో త్రైమాసికంలో ద్రవ్యోల్బణం ఇంకా పెరుగుతుందని భావిస్తున్న ఆర్బీఐ.. వడ్డీ రేట్లను మార్చకూడదని నిర్ణయించినట్లు తెలుస్తోంది.