Latest Fixed Deposit Interest Rates: పెట్టుబడులు పెట్టేందుకు మనకు ఎన్ని ఆప్షన్లు ఉన్నప్పటికీ.. ఇప్పటికీ సీనియర్ సిటిజెన్లు ఎక్కువగా బ్యాంక్ ఫిక్స్‌డ్ డిపాజిట్లపై ఆసక్తి చూపిస్తుంటారు. ఇక్కడ ఎలాంటి రిస్క్ ఉండదు. మీ పెట్టుబడులపై నిర్దిష్ట వడ్డీ రేట్ల ప్రకారం.. నిర్దిష్ట కాల పరిమితికి రాబడి వస్తుందని చెప్పొచ్చు. బ్యాంక్ డిపాజిట్లపై భద్రత కూడా ఉంటుందని చెప్పొచ్చు. అందుకే ఎక్కువగా స్థిరమైన రిటర్న్స్ కోసం బ్యాంక్ ఫిక్స్‌డ్ డిపాజిట్లు చేసేందుకు చూస్తుంటారు. ఇక్కడ వడ్డీ రేట్లు అన్ని బ్యాంకుల్లో ఒకేలా ఉండవన్న సంగతి తెలిసిందే. బ్యాంకుల్ని బట్టి వడ్డీ రేట్లలో తేడాలు ఉంటాయి. ప్రభుత్వ రంగ బ్యాంకులతో పోలిస్తే.. ప్రైవేట్ బ్యాంకుల్లో వడ్డీ రేట్లు కాస్త ఎక్కువగా ఉంటాయి. సుమారు 0.5 శాతం నుంచి ఒక శాతం వరకు అధికంగా ఉండొచ్చు. ఇంకా వీటితో పోలిస్తే స్మాల్ ఫైనాన్స్ బ్యాంకుల్లో వడ్డీ ఇంకా ఎక్కువ వస్తుంది. వీటన్నింటిలోనూ మళ్లీ సాధారణ ప్రజలతో పోలిస్తే సీనియర్ సిటిజెన్లకు వడ్డీ ఎక్కువ వస్తుంది. సాధారణ ప్రజల కంటే సీనియర్ సిటిజెన్లకు చాలా వరకు బ్యాంకులు 50 బేసిస్ పాయింట్ల వరకు అధిక వడ్డీ ఆఫర్ చేస్తుంటాయి. ఏదేమైనా ఫిక్స్‌డ్ డిపాజిట్ చేసే ముందు బ్యాంకుల్లో వడ్డీ రేట్లను పోల్చుకోవడం మంచిది. ఇప్పుడు మనం భారత్‌లోని టాప్ బ్యాంకుల్లో ఎఫ్‌డీ రేట్లు 1, 3, 5 సంవత్సరాల టెన్యూర్లకు ఎలా ఉన్నాయో చూద్దాం. ముందుగా అతిపెద్ద ప్రైవేట్ రంగ బ్యాంక్.. హెచ్‌డీఎఫ్‌సీ బ్యాంకులో ఏడాది టెన్యూర్‌పై 6.25 శాతం వడ్డీ వస్తుంది. మూడేళ్ల వ్యవధికి 6.45 శాతం, ఇదే విధంగా ఐదేళ్ల టెన్యూర్ డిపాజిట్లపై వడ్డీ రేటు 6.40 శాతంగా ఉంది. ఇవి సాధారణ ప్రజలకు కాగా.. సీనియర్ సిటిజెన్లకు 0.50 శాతం వరకు అధిక వడ్డీ వస్తుందని చెప్పొచ్చు. మరో ప్రైవేట్ దిగ్గజ బ్యాంక్.. ఐసీఐసీఐ బ్యాంకులో చూస్తే 1, 3, 5 సంవత్సరాల టెన్యూర్లపై వరుసగా 6.25 శాతం, 6.45 శాతం, 6.50 శాతంగా ఉన్నాయి. అతిపెద్ద ప్రభుత్వ రంగ బ్యాంక్ అయిన స్టేట్ బ్యాంక్ ఆఫ్ ఇండియాలో చూస్తే ఏడాది టెన్యూర్‌పై వడ్డీ రేటు 6.25 శాతంగా ఉండగా.. మూడేళ్ల టెన్యూర్ డిపాజిట్ వడ్డీ రేట్లు 6.30 శాతంగా ఉంది. ఇదే ఐదేళ్ల వ్యవధికి చూస్తే 6.05 శాతంగా ఉంది. ఇక్కడ కూడా సీనియర్ సిటిజెన్లకు 0.50 శాతం వరకు వడ్డీ ఎక్కువ వస్తుందని చెప్పొచ్చు.యాక్సిస్ బ్యాంకులో 1, 3, 5, ఏళ్ల టెన్యూర్ డిపాజిట్లపై వరుసగా వడ్డీ రేట్లు 6.25 శాతం, 6.45 శాతం, 6.45 శాతంగా ఉన్నాయి. బ్యాంక్ ఆఫ్ బరోడాలో చూస్తే వరుసగా వడ్డీ రేట్లు 6.10 శాతం, 6.25 శాతం, 6.30 శాతంగా ఉన్నాయి. పంజాబ్ నేషనల్ బ్యాంకులో 6.10 శాతం, 6.30 శాతం, 6.10 శాతంగా ఉన్నాయి. యెస్ బ్యాంకులో వడ్డీ రేట్లు 1, 3, 5 సంవత్సరాలకు చూస్తే వరుసగా 6.65 శాతం, 7 శాతం, 6.75 శాతంగా ఉన్నాయి.