Tras uns meses "complicados", Alberto Gil afirma que "agora estou ao 100%". Así o sinalou o extremo valenciano durante a súa presentación como novo xogador do Pontevedra, ao que afirma que chega para "aportar desde onde sexa". "Non hai moito que pensar cando vén a por ti un club como o Pontevedra", sinalou o futbolista, que procede do CD Guadalajara e que estivo arroupado polo coordinador da secretaría técnica do club, Jacobo Maestre. Afirma que nos poucos días que leva na cidade de Pontevedra "xa se nota a magnitude deste club", un equipo que, segundo destacou, "está a facer as cousas moi ben" e que ten unha afección "incrible". Aínda que recoñece a súa proximidade co técnico granate, Rubén Domínguez, co que coincidiu tres anos no Ourense CF, Alberto Gil, defendeu que "ninguén me vai a regalar nada" e que terá que traballar "día a día" para facerse un oco no equipo. "El sabe o que lle podo achegar ao equipo e eu sei o que me vai a pedir", apuntou. Para el, "xa non é anecdótico" que o Pontevedra estea a loitar polo ascenso, porque afirma que os seus compañeiros están a asinar unha tempada "espectacular" e considera que "se ve no día a día por que están na situación na que están". Tras recoñecer que houbo "conversacións" no verán para a súa chegada a Pasarón, o extremo chega agora tras superar uns meses complicados que, segundo subliñou, "axudáronme a aprender moitísimo". "Son unha persoa que sempre do malo tende a sacar o mellor", confesou o futbolista, que afirma que chega "con moitas ganas" e disposto a ocupar posicións de ataque "xa sexa pola dereita, pola esquerda ou na mediapunta". Cando lle toque xogar, garantiu, "fareino da mellor forma posible e xa está". Presentación de Alberto Gil como novo xogador del Pontevedra CFPontevedraViva CHEGARÁN MÁIS REFORZOS Jacobo Maestre, pola súa banda, avanzou que "quedan un par de xogadores por chegar" neste mercado de inverno, un reforzo que o club espera pechar esta mesma semana. "Estamos a ver cales son as posibilidades que máis nos poden axudar de aquí a final de tempada", sostivo Maestre, que recoñeceu que unha das prioridades do corpo técnico sería un dianteiro. Serán, en todo caso, xogadores que "poidan achegar máis do que temos", insistiu o responsable da secretaría técnica, que sentenciou que "até o último día pode pasar de todo".