ఉమ్మడి వరంగల్‌ జిల్లాలోని నిరుద్యోగ యువతకు తెలంగాణ ప్రభుత్వం తీపి కబురు అందించింది. రెండేళ్ల సుదీర్ఘ నిరీక్షణ తర్వాత.. వరంగల్ ఎస్సీ స్టడీ సర్కిల్ ద్వారా వివిధ ప్రభుత్వ ఉద్యోగాలకు ఇచ్చేందుకు నోటిఫికేషన్ విడుదల చేసింది. హనుమకొండ జిల్లా కలెక్టర్ స్నేహా శబరీష్, షెడ్యూల్డ్ కులాల అభివృద్ధి శాఖ అధికారులతో కలిసి ఈ ఉచిత కోచింగ్ వివరాలను వెల్లడించారు. ఈ అవకాశం ఉమ్మడి వరంగల్ జిల్లాలోని అర్హులైన అభ్యర్థులందరికీ ఒక గొప్ప వరమని చెప్పవచ్చు.2025-26 విద్యా సంవత్సరానికి గాను మొత్తం 100 మంది అభ్యర్థులను ఎంపిక చేసి, వారికి ఐదు నెలల పాటు 'ఫౌండేషన్ కోర్స్' అందిస్తారు. కేవలం శిక్షణ మాత్రమే కాకుండా, ఎంపికైన అభ్యర్థులకు ఉచిత భోజనం, వసతి సౌకర్యాలను ప్రభుత్వం కల్పించనుంది. ఈ శిక్షణలో భాగంగా అభ్యర్థులను స్టేట్ లెవల్ పోటీ పరీక్షలతో పాటు, నేషనల్ లెవల్‌లో నిర్వహించే ఆర్‌ఆర్‌బీ (RRB), బ్యాంకింగ్, మరియు స్టాఫ్ సెలక్షన్ కమిషన్ (SSC) వంటి పరీక్షలకు సిద్ధం చేస్తారు.అర్హతలు మరియు ఎంపిక విధానంఈ ఉచిత శిక్షణకు దరఖాస్తు చేసుకోవాలనుకునే అభ్యర్థులు పలు అర్హతలు కలిగి ఉండాలి. గుర్తింపు పొందిన యూనివర్సిటీ నుండి ఏదైనా డిగ్రీ ఉత్తీర్ణులై ఉండాలి.అభ్యర్థి కుటుంబ వార్షిక ఆదాయం రూ. 3 లక్షలకు మించకూడదు.అభ్యర్థులను ఫిబ్రవరి 8న నిర్వహించే ప్రవేశ పరీక్ష ద్వారా ఎంపిక చేస్తారు. ఈ పరీక్ష ఉదయం 10 గంటల నుండి మధ్యాహ్నం 1 గంట వరకు జరుగుతుంది.రిజర్వేషన్ల వివరాలుసామాజికంగా వెనుకబడిన వర్గాలకు ప్రాధాన్యత ఇస్తూ సీట్లను కేటాయించారు. ఎస్సీ (SC) అభ్యర్థులకు: 75%, ఎస్టీ (ST) అభ్యర్థులకు: 10%, బీసీ (BC) అభ్యర్థులకు: 15%, మొత్తం సీట్లలో మహిళలకు 33 శాతం, దివ్యాంగులకు 5 శాతం అంతర్గత రిజర్వేషన్లు వర్తిస్తాయి.ఆసక్తి ఉన్న అభ్యర్థులు ఈ నెల 30 వరకు వెబ్‌సైట్ ద్వారా ఆన్‌లైన్‌లో దరఖాస్తు చేసుకోవాలి. దరఖాస్తు సమయంలో పదో తరగతి, ఇంటర్, డిగ్రీ మార్కుల మెమోలు, కుల, ఆదాయ ధ్రువీకరణ పత్రాలు మరియు ఆధార్ కార్డు వంటి పత్రాలను సిద్ధం చేసుకోవాలి. మరిన్ని వివరాల కోసం 040-23546552 లేదా 95428 34507 నంబర్లను సంప్రదించవచ్చు. నిరుద్యోగ అభ్యర్థులు ఈ అవకాశాన్ని వినియోగించుకుని తమ ప్రభుత్వ ఉద్యోగ కలను సాకారం చేసుకోవాలని అధికారులు కోరుతున్నారు.