అందరూ ఊహించినట్టే - మధ్య రసవత్తర పోరు సాగింది. గ్రూప్ బీలో మంగళవారం రాత్రి జరిగిన ఉత్కంఠభరిత మ్యాచ్‌లో బంగ్లాదేశ్ విజయం సాధించింది. ఆఖరి వరకూ టెన్షన్ పుట్టించిన ఈ మ్యాచ్‌లో అప్ఘనిస్తాన్ కేవలం 8 పరుగుల తేడాతో ఓటమిపాలయింది. ఈ మ్యాచ్‌లో బంగ్లాదేశ్ గెలవడంతో ఇప్పుడు గ్రూప్ బీలో సూపర్ 4 క్వాలిఫికేషన్ చాలా టఫ్‌గా మారింది. అబుదాబీ వేదికగా జరిగిన ఈ మ్యాచ్‌లో బంగ్లాదేశ్ జట్టు టాస్ గెలవగా, కెప్టెన్ లిట్టన్ కుమార్ దాస్ బ్యాటింగ్ ఎంచుకున్నాడు. ఓపెనర్లు సైఫ్ హాసన్, తంజిమ్ హాసన్ తొలి వికెట్‌కు మంచి భాగస్వామ్యం నెలకొల్పారు. ఓవర్‌కి పది రన్ రేట్‌తో బంగ్లాకు శుభారంభం అందించారు. 7వ ఓవర్‌లో సైఫ్ హాసన్ 28 బంతుల్లో రెండు ఫోర్లు, ఒక సిక్సర్‌తో 30 పరుగులు చేసి అవుటయ్యాడు. కెప్టెన్ లిట్టన్ కుమార్ దాస్ మాత్రం 11 బంతుల్లో కేవలం తొమ్మిది పరుగులే చేసి నిరాశ పరిచాడు. మరో ఓపెనర్ తంజిమ్ హాసన్ 31 బంతుల్లో నాలుగు ఫోర్లు, మూడు సిక్సర్లతో 52 పరుగులు చేసి బంగ్లాకు భారీ స్కోర్ అందించడంలో సహకరించాడు. తౌహిద్ హృదోయ్ 20 బంతుల్లో 26 పరుగులు చేయగా, ఆఖర్లో నురుల్ హాసన్ ఆరు బంతుల్లో 12 పరుగులు చేశాడు. దాంతో బంగ్లాదేశ్ జట్టు నిర్ణీత 20 ఓవర్లలో 5 వికెట్ల నష్టానికి 154 పరుగులు చేసింది. బంగ్లా ఇచ్చిన 155 పరుగుల టార్గెట్‌తో బరిలోకి దిగిన అప్ఘనిస్తాన్‌కు ఆరంభంలోనే ఎదురుదెబ్బ తగిలింది. ఓపెనర్ సెడీకుల్లా అటల్ ఫస్ట్ బాల్‌కే డకౌట్ అయ్యాడు. దాంతో ఆరంభంలోనే తడబడ్డ అప్ఘన్లు ఆ వెంటనే ఇబ్రహీం జర్దాన్ వికెట్ కూడా కోల్పోయారు. గుల్బాదిన్ నాయబ్, రహ్మానుల్లా గుర్భాజ్ కూడా వెంటనే అవుటవ్వడంతో 62 పరుగులకే నాలుగు వికెట్లు కోల్పోయింది. రహ్మానుల్లా 31 బంతుల్లో 35 పరుగులు చేయగలిగాడు. హాంకాంగ్ మీద విరుచుకుపడిన అజ్మతుల్లా మరోసారి బంగ్లాకి చుక్కలు చూపెట్టాడు. కేవలం 16 బంతుల్లో 30 పరుగులు చేసి అప్ఘనిస్తాన్‌లో ఆశలు రేపెట్టాడు. ఆ తర్వాత కెప్టెన్ రషీద్ ఖాన్ కూడా 11 బంతుల్లో 20 పరుగులు చేయడంతో అప్ఘనిస్తాన్ గెలుస్తుందని అందరూ అనుకున్నారు. కానీ ఆఖర్లో ముస్తాఫిజుర్ రషీద్ ఖాన్, ఏఎం ఘజన్‌ఫర్‌ను వరుస బంతుల్లో పెవిలియన్‌కు పంపడంతో బంగ్లా విజయం ఖరారైంది. 20 ఓవర్లలో 146 పరుగులకు అప్ఘనిస్తాన్ ఆలౌట్ కావడంతో బంగ్లా 8 పరుగుల తేడాతో విజయం సాధించింది. బంగ్లాదేశ్ జట్టులో నాసుమ్ అహ్మద్ నాలుగు ఓవర్లలో ఒక మేడిన్‌తో కేవలం 11 పరుగులు ఇచ్చి 2 వికెట్లు తీసుకున్నాడు. దాంతో ప్లేయర్ ఆఫ్ ది మ్యాచ్ అవార్డు దక్కింది. ముస్తాఫిజుర్ రెహ్మాన్ నాలుగు ఓవర్లలో 3 వికెట్లు తీసుకుని 28 పరుగులు ఇచ్చాడు. బంగ్లాదేశ్ ఈ మ్యాచ్‌లో విజయం సాధించడంతో గ్రూప్ బీ నుంచి సూపర్ 4 క్వాలిఫికేషన్ చాలా టఫ్‌గా మారింది. శ్రీలంక, బంగ్లాదేశ్ నాలుగు పాయింట్లతో మొదటి రెండు స్థానాల్లో నిలిచాయి. అప్ఘనిస్తాన్ రెండు పాయింట్లతో ఉండగా సెప్టెంబర్ 18న శ్రీలంక - అప్ఘనిస్తాన్ మధ్య జరిగే మ్యాచ్ కీలకంగా మారింది. ఆ మ్యాచ్‌లో అప్ఘనిస్తాన్ గెలిస్తే శ్రీలంక, అప్ఘన్ సూపర్ 4కి వెళ్లే అవకాశం ఉంది. ఒకవేళ ఆ మ్యాచ్‌లో ఓడిపోతే అప్ఘనిస్తాన్ ఇంటికి, బంగ్లా సూపర్ 4కి వెళ్లనుంది.