తేజ సజ్జా, మంచు మనోజ్ ప్రధాన పాత్రల్లో తెరకెక్కిన లేటెస్ట్ మూవీ మిరాయ్. ఈగల్ ఫేమ్ కార్తీక్ ఘట్టమనేని దర్శకత్వం వహించిన ఈ పాన్ ఇండియా చిత్రాన్ని పీపుల్ మీడియా ఫ్యాక్టరీ బ్యానర్ లో రూపొందించారు. హీరోల మార్కెట్, డైరెక్టర్ ట్రాక్ రికార్డ్ వంటివి పట్టించుకోకుండా భారీ బడ్జెట్ తో నిర్మించారు నిర్మాత టీజీ విశ్వప్రసాద్. ఆయన నమ్మకాన్ని నిజం చేస్తూ ఈ సినిమా బాక్సాఫీస్ దగ్గర బ్లాక్ బస్టర్ దిశగా దూసుకుపోతోంది. విడుదలైన ఐదు రోజుల్లోనే మైల్ స్టోన్ క్లబ్‌లో చేరిపోయింది. మిరాయ్ మూవీ మొదటి రోజే ప్రపంచ వ్యాప్తంగా రూ.27.20 కోట్లు వసూలు చేసినట్లు మేకర్స్ ప్రకటించారు. రెండో రోజు రూ. 28.40 కోట్లు, థర్డ్ డే రూ.25.60 కోట్లు కలెక్ట్ చేయగా.. నాల్గవ రోజు సోమవారం రూ. 10.25 కోట్లు వచ్చినట్లుగా తెలిపారు. ఐదో రోజు రూ.8 కోట్లకు పైగా గ్రాస్ రాబట్టి, రూ.100 కోట్ల మైలురాయి క్లబ్ లో చేరినట్లుగా చిత్ర బృందం సోషల్ మీడియా వేదికగా ప్రకటించింది. ఈ మేరకు పోస్టర్ రిలీజ్ చేసింది. మిరాయ్ చిత్రం 5 రోజుల్లో వరల్డ్ వైడ్ గా రూ. 100.40 కోట్ల గ్రాస్ వసూళ్లు సాధించింది. హనుమాన్ సినిమాతో తొలిసారిగా వంద కోట్ల క్లబ్ లో చేరిన తేజ సజ్జా.. ఇప్పుడు మరోసారి రేర్ ఫీట్ ని అందుకున్నాడు. మరోవైపు ఓవర్ సీస్ లోనూ తేజ అరుదైన ఘనత వహించాడు. మిరాయ్ ఈ చిత్రం నార్త్ అమెరికాలో $2 మిలియన్ డాలర్లు కలెక్ట్ చేసింది. దీంతో బ్యాక్ టూ బ్యాక్ రెండు 2 మిలియన్ సినిమాలు ఉన్న హీరోల జాబితాలో తేజ సజ్జా చేరిపోయాడు.ఇదిలా ఉంటే మిరాయ్ మూవీ బాక్సాఫీస్ వద్ద రూ.100 కోట్లు కొట్టిన తరుణంలో.. తేజ, మనోజ్ సోషల్ మీడియాలో పెట్టిన పోస్టులు కొత్త చర్చను తెర మీదకు తీసుకొచ్చాయి. తేజ సజ్జా తన ఫోటోతో ఉన్న పోస్టర్ ను పోస్ట్ చేస్తే.. మంచు మనోజ్ తన పిక్ తో కలెక్షన్ పోస్టర్ పంచుకున్నారు. క్రెడిట్ కోసం ఇలా ఇద్దరూ ఎవరికి వారు వేర్వేరుగా కలెక్షన్ పోస్టులు వేసుకుంటున్నారని నెటిజన్లు కామెంట్స్ చేస్తున్నారు. మిరాయ్ మూవీలో హీరోగా తేజ నటించగా.. విలన్ గా మనోజ్ కనిపించారు. కథలో ఇద్దరికీ సమ ప్రాధాన్యత ఉంది. చాలా సన్నివేశాల్లో ప్రతినాయకుడు కథానాయకుడిని డామినేట్ చేసేశాడు. ఇరువురికి సమపాళ్లలో క్రెడిట్ దక్కుతుందని పలువురు అభిప్రాయ పడుతున్నారు. పీపుల్ మీడియా ఫ్యాక్టరీ టీమ్ మాత్రం కేవలం తేజ సజ్జా ఫోటోతో కలెక్షన్ పోస్టర్ రిలీజ్ చేశారు. ఇద్దరూ కలిసి ఉన్న ఫోటో వేస్తే బాగుండేదని మరికొందరు కామెంట్లు చేస్తున్నారు.