టీమిండియా యువ ఓపెనర్ రికార్డుల మీద రికార్డులు సృష్టిస్తున్నాడు. . ఆసియా కప్‌లో ప్రత్యర్థులపై విరుచుకుపడుతున్నాడు. ముఖ్యంగా పాక్ పేసర్ షాహీన్ షా అఫ్రిది బౌలింగ్‌లో ఈ ఆసియా కప్‌లో జరిగిన రెండు మ్యాచ్‌లలోనూ బౌండరీలతోనే ఇన్నింగ్స్‌ని ఆరంభించాడు. గ్రూప్ మ్యాచ్‌లో ఫోర్‌తో ఖాతా తెరిచిన అభిషేక్, సూపర్ 4లో సిక్సర్‌తో ఆట మొదలుపెట్టాడు. దుబాయ్ వేదికగా జరిగిన మ్యాచ్‌లో అభిషేక్ శర్మ అరుదైన ఘనత సాధించాడు. అతి తక్కువ బంతుల్లోనే 50 సిక్సర్లు నమోదు చేసిన భారత ఆటగాడిగా నిలిచాడు. కేవలం 20 ఇన్నింగ్స్‌లలోనే ఈ మైలురాయిని అందుకుని.. వెస్టిండీస్ పవర్ హిట్టర్ ఎవిన్ లూయిస్ రికార్డును సమం చేశాడు. అయితే బంతుల పరంగా చూసుకుంటే లూయిస్ కంటే వేగంగా 331 బంతుల్లో ఈ రికార్డును అందుకున్న ఏకైక ఆటగాడిగా చరిత్ర స‌ృష్టించాడు. అదేవిధంగా ఫుల్ మెంబర్ నేషన్స్‌లో అతి తక్కువ బంతుల్లో 50 సిక్స్‌లు బాదిన ఆటగాడిగా కూడా అభిషేక్ పేరు రికార్డు బుక్స్‌లో చేరింది.ఇప్పటివరకు టీ 20ల్లో 20 ఇన్నింగ్స్‌లు ఆడిన అభిషేక్ శర్మ 197 స్ట్రయిక్ రేట్‌, 35.40 యావరేజ్‌తో 708 పరుగులు చేశాడు. అభిషేక్ తన కెరీర్‌లో 63 ఫోర్లు, 53 సిక్స్‌లు బాదాడు. అంతేకాకుండా, పాకిస్తాన్ స్టార్ బౌలర్ షాహీన్ అఫ్రీది వేసిన తొలి బంతిని సిక్స్‌గా మలచిన తొలి బ్యాట్స్‌మన్‌గా నిలిచాడు. ఇదే టోర్నమెంట్‌లో యూఏఈపై కూడా తొలి బంతికే సిక్స్ బాదిన అభిషేక్, ఈ ఘనతను రెండు సార్లు సాధించిన ఏకైక భారత ఆటగాడిగా రికార్డు సృష్టించాడు.ఇప్పటి వరకు భారత్ తరఫున తొలి బంతికే సిక్స్‌ బాదిన బ్యాటర్లు నలుగురు ఉంటే అందులో అభిషేక్ తన పేరు లిఖించాడు. రోహిత్ శర్మ 2021‌లో ఇంగ్లండ్ బౌలర్ రషీద్ బౌలింగ్‌లో సిక్స్ బాది ఫస్ట్ ఇండియన్ క్రికెటర్‌గా నిలిచాడు. యశస్వి జైస్వాల్ 2024లో జింబాబ్వే బౌలర్ సికందర్ రజా బౌలింగ్‌లో, సంజూ శాంసన్ ఇంగ్లండ్ పేసర్ జోఫ్రా ఆర్చర్ బౌలింగ్‌లో ఫస్ట్ బాల్ సిక్సర్ బాదారు. అభిషేక్ శర్మ ఈ ఫీట్‌ను రెండుసార్లు సాధించడం విశేషం. యూఏఈపై జరిగిన మ్యాచ్‌తో పాటు పాక్‌పై సూపర్ 4లో జరిగిన మ్యాచ్‌లో సిక్సర్ బాది రికార్డు సృష్టించాడు. అభిషేక్ తన అర్ధ శతకం కేవలం 24 బంతుల్లోనే పూర్తి చేశాడు. ఇది పాకిస్థాన్‌పై భారత ఆటగాడు చేసిన ఫాస్టెస్‌ హాఫ్ సెంచరీ. ఈ క్రమంలో తన మెంటార్ యువరాజ్ సింగ్ 29 బంతుల్లోనే చేసిన హాఫ్ సెంచరీ రికార్డును అధిగమించడం విశేషం. దుబాయ్ వేదికగా జరిగిన ఈ మ్యాచ్‌లో 39 బంతులు ఆడిన అభిషేక్ శర్మ ఆరు ఫోర్లు, ఐదు సిక్సర్లతో 74 పరుగులు చేసి అవుటయ్యాడు.