O Concello de Soutomaior conmemorará o Día Mundial do Turismo cun acto singular que situará o Camiño de Santiago no centro da súa estratexia turística sostible. A cita, programada para o próximo sábado 27 de setembro ás 19:30 horas no Multiúsos de Arcade, reunirá especialistas, empresarias locais e música en directo nunha velada que pretende reforzar o posicionamento da ruta xacobea como produto turístico de longo prazo. Esta proposta dá continuidade ás mesas de traballo cos profesionais e empresas do concello celebradas a finais de 2024 e ao proxecto "Experiencias do camiño de Santiago", que buscou optimizar o rendemento turístico da ruta histórica. Silvia Cernadas, responsable de turismo, presentará o evento nun espazo emblemático: a antiga fábrica de carburos de calcio Laforet, rehabilitada como exemplo de transformación de espazos industriais para novos usos culturais e sociais. A tertulia, moderada pola profesional do turismo Minia Del Río de Latexos de Turismo, contará coa participación da antropóloga Lidia Mariño, que explorará os seres míticos e lendas do Camiño como a Raíña Lupa, a Santa Compaña e o Santo Graal, revelando a existencia dun camiño ancestral vinculado a ideas espirituais relacionadas co ciclo solar. José Antonio de la Riera, investigador, escritor, hospitaleiro e peregrino, achegará a súa perspectiva sobre o pasado, presente e futuro da ruta xacobea. Ademais, dúas empresarias locais compartirán as súas vivencias: Lisi Martínez, do albergue A Filla do Mar, relatará o contacto diario cos peregrinos no seu establecemento situado na entrada do concello, mentres que Susi Soto presentará a historia de A Mochila da Luz, unha iniciativa que cada xullo percorre o camiño desde o Porto ata Santiago de Compostela. O cantautor galego Manoele de Felisa interpretará temas do seu disco "Cancioneiro do Camiño", achegando ao público historias, contos e cantos que reflicten a realidade da peregrinación xacobea. A iniciativa forma parte das liñas de traballo que o consistorio desenvolve baseadas nunha planificación estratéxica centrada nas persoas, xestión responsable dos recursos naturais e escoita activa dos axentes económicos do municipio, segundo apuntan desde o Concello. Silvia Cernadas concelleira de Turismo en SoutomaiorConcello de Soutomaior