నటించిన ‘ఓజీ’ చిత్రంపై రోజురోజుకీ అంచనాలు పెరిగిపోతున్నాయి. సుజీత్ దర్శకత్వంలో తెరకెక్కిన ఈ చిత్రాన్ని డీవీవీ ఎంటర్‌టైన్‌మెంట్స్ బ్యానర్‌పై డీవీవీ దానయ్య ప్రతిష్ఠాత్మకంగా నిర్మించారు. ఇటీవల విడుదల చేసిన ట్రైలర్‌తో హైప్ పీక్స్‌కి వెళ్లిపోయింది. ఈ హైప్‌తో జనాలు చచ్చిపోయేలా ఉన్నారంటూ నెటిజన్లు కామెంట్లు చేస్తున్నారు. ‘ఓజీ’ చిత్రానికి తెలుగు రాష్ట్రాల ప్రభుత్వాలు ప్రత్యేక అనుమతులు ఇవ్వడంతో బుధవారం రాత్రే ప్రీమియర్ షోలు పడనున్నాయి. ఈలోగా చాలామంది ఈ సినిమా ఎలా ఉండబోతుందోనని రివ్యూలు చెప్పేస్తున్నారు. తాజాగా ‘ఓజీ’ చిత్రంపై మాజీ మంత్రి, వైసీపీ నేత చేసిన వ్యాఖ్యలు హాట్‌టాపిక్‌గా మారాయి. పవన్ కళ్యాణ్ అంటేనే అంతెత్తున ఎగిరిపడే అంబటి రాంబాబు ‘ఓజీ’ చిత్రం ఘన విజయం సాధించాలని కోరుకుంటున్నట్లు చెప్పడం చర్చనీయాంశమైంది. ఇంతకీ అంబటి రాంబాబు ఏమన్నారంటే.. ‘పవన్ కళ్యాణ్ నటించిన ‘ఓజీ’ చిత్రం నాకున్న పరిజ్ఞానం మేరకు ఖచ్చితంగా హిట్ అవుతుందని అనుకుంటున్నాను. దానికి ప్రధానమైన కారణాలు ఏంటంటే పవన్ కళ్యాణ్ ఇంతకుముందు నటించిన రెండు చిత్రాలు బ్రో, హరిహర వీరమల్లు అనుకున్నంత విజయం సాధించలేకపోయాయి అందువల్లే ‘ఓజీ’ సినిమా కచ్చితంగా విజయం సాధించాలని పవన్ కళ్యాణ్ కసితో పనిచేసి ఉంటారనేది నా అభిప్రాయం. దాంతో పాటు డైరెక్టర్ గత రెండు సినిమాలు కూడా పెద్దగా ఆడలేదు. కాబట్టి ఈ చిత్రాన్ని హిట్ చేయాలని ఆయన గట్టి పట్టుదల కలిగి ఉంటాడు. మూడోది చిత్ర నిర్మాత దానయ్య. ఈ చిత్రం హిట్టు కొట్టాలని ఆయన ఖర్చుకి వెనకాడలేదు. ఇన్ని పట్టుదలల మధ్య జరిగిన నిర్మించిన ఈ చిత్రం కొంత మెరుగైన ఫలితాలు ఇస్తాయని నమ్ముతున్నా. ఆ నమ్మకంతో ‘ఓజీ’ కచ్చితంగా విజయం సాధిస్తుందని భావిస్తున్నాను. ‘హరిహర వీరమల్లు’ చిత్రం హడావుడిగా తీశారు. అనుకున్న స్థాయిలో గ్రాఫిక్స్ చేయలేకపోయారు. చివరికి సినిమా విడుదలైతే చాలు అన్న పరిస్థితుల్లో షూటింగ్ జరిగింది. ‘ఓజీ’ విషయానికొస్తే పవన్ కళ్యాణ్ రాష్ట్ర ఉప ముఖ్యమంత్రి బాధ్యతల్ని కూడా పక్కనబెట్టి తీసిన సినిమా. అందువల్ల కచ్చితంగా విజయవంతం కావాలని నా కోరిక. పవన్ కళ్యాణ్ సినిమాలు విజయవంతం కాకూడదని కోరుకోవాల్సిన అవసరం మాకు లేదు. రాజకీయంగా ఆయన మాకు ప్రత్యర్థి కాబట్టి విమర్శిస్తుంటాం. అవి కూడా సద్విమర్శలే చేస్తాం’ అంటూ అంబటి రాంబాబు వీడియోలో పేర్కొన్నారు. అంబటి రాంబాబు రివ్యూపై నెటిజన్లు రకరకాలుగా స్పందిస్తున్నారు. అసెంబ్లీకి వెళ్లి ప్రజా సమస్యలపై ప్రశ్నించమని జగన్‌కి చెప్పడం మానేసి నువ్వేంటి సినిమా రివ్యూలు ఇస్తున్నావ్, ఏదో తేడా కొడుతోంది రాంబాబూ, నీ బతుక్కి ఇంక రివ్యూలు చెప్పుకుని బతకడమే, త్వరలో పార్టీ మారే ఆలోచన ఏమైనా ఉందా, మంత్రి స్థాయి నుంచి రివ్యూలు చెప్పుకునే స్థితికి దిగజారిపోయావ్ అంబటి’ అంటూ నెటిజన్లు కామెంట్లు చేస్తున్నారు.