A repercusión mediática dos Feroz 2025 foi "sobresaínte". Así o destacaron os seus organizadores que, coincidindo co arranque as actividades para a súa edición de 2026, fixeron balance do impacto que estes premios tiveron na proxección de Pontevedra. Así, o primeiro dos dous anos que os Feroz estará na Boa Vila supuxeron unha difusión da imaxe de Pontevedra valorada en 33,5 millóns de euros, segundo explicou Fernando de Luís Orueta, responsable da Asociación de Informadores Cinematográficos de España (AICE). Nesta cifra inclúense, entre outras cuestións, as publicacións falando de Pontevedra nos medios de comunicación, a conversación en redes sociais, a retransmisión por televisión ou as campañas publicitarias que promocionaron a celebración dos propios premios. En concreto, os medios de comunicación publicaron máis de 1.800 informacións sobre a celebración dos Premios Feroz en Pontevedra, o que suma unha audiencia acumulada que supera os 5.000 millóns de impactos. En redes sociais, pola súa banda, superáronse as 3.600 mencións aos Feroz en Pontevedra, alcanzando a máis de 15 millóns de usuarios; e a cerimonia, retransmitida por La 2 de TVE, foi vista nalgún momento por máis de 2,1 millóns de espectadores. O día da gala acreditáronse 171 xornalistas de 87 medios para cubrir o 'photocall' dos asistentes e o circuíto de entrevistas polo que pasaron todas as estrelas. A eles súmanse outros 122 xornalistas membros da AICE. Ademais, realizáronse 1.300 reservas hoteleiras e estudantes do campus de Pontevedra e do CIFP Carlos Oroza tiveron a oportunidade de colaborar na celebración da cerimonia. A organización considera ademais "fundamental" para consolidar este impacto para Pontevedra todas as actividades previas que se organizaron antes da gala, entre elas dezasete proxeccións de películas e series, nas que houbo unha asistencia media do 90%. Estes datos, sostivo Fernando de Luís Orueta, "son moi positivos" tanto para Pontevedra como para os propios Premios Feroz, que están "súper orgullosos" de conectar dunha maneira "tan impresionante" coa cidade e cos seus habitantes. "Encántanos esta simbiose entre a organización e a cidade e estamos desexando repetila", subliñou o representante da organización dos Feroz, que considera que o listón "está moi alto" para a edición de 2026, cuxo colofón será a gala do 24 de xaneiro. O alcalde de Pontevedra, Miguel Anxo Fernández Lores, celebrou esta repercusión económica e mediática. Na cidade, asegurou, "pasan cousas que non pasan por casualidade", senón que forman parte dunha "posición política" para promocionar a Boa Vila. "Ten que ver coa confianza que o goberno ten na propia cultura e na cidade capaz de acoller eventos importantísimos que teñen transcendencia económica e de proxección internacional", subliñou Fernández Lores, xerando emprego e beneficios económicos en toda a comarca. UNHA PROGRAMACIÓN "TAN AMBICIOSA OU MÁIS" QUE EN 2025 De cara aos Feroz 2026, os organizadores impulsarán unha programación "tan ambiciosa ou máis" que a do ano pasado e aseguran notar "moitísimo interese" en toda a industria audiovisual por acudir a Pontevedra para asistir á cerimonia. Sobre as actividades previas, De Luís Orueta avanzou que "non queremos repetir o mesmo esquema" e, a maiores de proxeccións, haberá "miniciclos" con mesas redondas nas que poidan reunirse varios cineastas ou actos polos aniversarios de películas ou series importantes. "Queremos que a programación sexa un pouco distinta, ofrecendo un contido que sexa novo, pero mantendo a idea de traer a Pontevedra a cineastas de primeiro nivel", indicou o representante da organización. O que non está sobre a mesa, polo menos por agora, é que os Feroz poidan continuar en Pontevedra máis aló de 2026. "Indiscutiblemente ter un evento destas características sempre é positivo telo", sinalou o rexedor pontevedrés. O propio Fernández Lores engadiu, con todo, que estes premios tiveron sempre un carácter "viaxeiro" co que buscan achegar o audiovisual a todas as comunidades autónomas polo que "entendemos que máis de dous anos ao mellor non está previsto". En todo caso, defendeu que "se fora posible nós estariamos encantados", pero asegurou que, polo momento, "non falamos diso".