A artista e xornalista cultural Galia Blanco presenta desde este sábado no Museo Manuel Torres de Marín a exposición "Es ti que cantas", unha proposta que combina arte e denuncia social centrándose na violencia exercida contra as mulleres. A inauguración terá lugar o sábado 20 ás 12.00 horas coa presenza do pintor Antón Sobral. A mostra permanecerá aberta ata o 5 de outubro en horario de martes a venres de 11.00 a 14.00 e de 18.00 a 21.00 horas, e fins de semana de 11.00 a 14.00 horas. O elemento máis destacado da exposición é unha instalación interactiva que inclúe un velo "tosco, pesado e brutalmente tecido" pola propia Blanco e un espello de sobremesa. A artista convida aos visitantes a probarse o velo, mirarse ao espello e reflexionar sobre a realidade que viven millóns de mulleres no mundo. Esta proposta representa unha novidade na traxectoria de Galia Blanco, que incorpora por primeira vez técnicas artesanais tradicionalmente realizadas por mulleres. A creadora galega, coñecida polos seus "Popsportraits" e series como "Agripop", "Eternas" e "Harmonía", utiliza a arte como ferramenta de resistencia e transformación social. Na súa obra, Blanco fusiona a cor vibrante do acrílico coa expresividade do lino gravado, creando pezas que reivindican o cotiá, as raíces e os dereitos humanos. Ao mesmo tempo, como xornalista, dialoga coa realidade, pero a través da arte traduce as emocións en "refuxio, resistencia e verdade". Galia Blanco. Concello de Marín