A Universidade de Vigo reitera o seu interese por construír un novo edificio en Tafisa, que estaría dedicado ao grao en Deseño e por xuntar todas as titulacións en ciencias da saúde, as de Fisioterapia e Enfermaría, no Hospital Provincial. Así o manifestou este martes o reitor, Manuel Reigosa, durante a reunión do Consello de Campus de Pontevedra desenvolvida na Casa das Campás. O encontro tiña como obxectivo recoller as opinións dos responsables dos decanatos e direccións das diferentes facultades e escolas pontevedresas respecto da programación global do campus en materia de infraestruturas. Ante todos eles, Reigosa reiterou o interese da institución académica pola cesión da parcela municipal nos terreos da antiga fábrica de Tafisa, á vez que insistiu en que se mantén o desexo de aproveitar o edificio do Hospital Provincial. Esta cesión, recoñeceu o reitor, está adiada mentres non estea rematada a ampliación do hospital de Montecelo, "que parece que vai tardar máis do que estaba inicialmente previsto". Non obstante, reiterou que "seguimos reivindicando o noso interese" por poder trasladar nun futuro a este espazo as titulacións de ciencias da saúde, acollendo tanto Fisioterapia como unha das tres sedes da futura Facultade de Enfermaría. Esta xuntanza tamén avaliou a recente constitución do Instituto de Investigación en Ciencias do Deporte (Cidega), o primeiro do campus de Pontevedra, e o estado dos proxectos de investigación que están en marcha. A universidade está a detectar unha "tendencia á alza" tanto no número de proxectos, como nas subvencións acadadas polas investigacións en Pontevedra, un total de quince, que supuxeron un financiamento de preto dun millón de euros. En 2025 chegaron 164 investigadores visitantes, dos que o 15% tiveron como destino Pontevedra, sendo a Facultade de Ciencias da Educación e do Deporte e a Escola de Enxeñaría Forestal, co 4% e 2% do total, os centros do campus con maior número deles. En materia de transferencia, o financiamento de actividades de I+D no campus situouse en preto de 200.000 euros, a través de máis de trinta contratos, informes ou cursos. Pola súa banda, a vicerreitora do campus, Eva Lantarón, destacou as actuacións desenvolvidas no campus en materia cultural e de infraestruturas, así como nas iniciativas promovidas polo Campus Crea. Entre outras cuestións, lembrou o desenvolvemento do II Congreso Internacional de Creatividade e anunciou a próxima publicación dun catálogo dixital de grupos de investigación adscritos ao Campus Crea. Lantarón anunciou tamén a convocatoria da II Olimpíada da Creatividade, que terá lugar no mes de abril e que está dirixida a equipos de estudantes de bacharelato, 4º da ESO e de ciclos formativos de artes plásticas e deseño. A vicerreitora fixo balance así mesmo da XX Semana de Recollida de RAEE, que permitiu reunir preto de 1.500 quilos de residuos de aparellos eléctricos e electrónicos, que foron trasladados a un xestor autorizado para o seu tratamento. E en materia de infraestruturas, sinalou a instalación no campus dunha xardineira con plantas aromáticas e abordou tamén os traballos que se están a desenvolver para a creación dunha horta didáctica tras Ciencias da Educación e do Deporte.