O Bloque Nacionalista Galego de Vilagarcía de Arousa fixo un chamamento público ao goberno local para que desista da solta de globos prevista para a celebración da toma das uvas de fin de ano. A formación nacionalista considera esta acción un "gasto innecesario" de preto de 10.000 euros e advirte das "graves consecuencias" ecolóxicas que podería ter para o medio ambiente, especialmente nunha cidade costeira. Segundo o BNG, o desembolso económico para esta actividade é "desorbitado" e inxustificado, dado que o evento da toma das uvas na praza de Ravella xa congrega a milleiros de persoas cada 31 de decembro sen necesidade de reclamos adicionais. Tamén critican que se destine unha partida tan elevada a un elemento que consideran superfluo. Inciden, ademais, na pegada ecolóxica. Aínda que os materiais se vendan como ecolóxicos, o BNG argumenta que tardarían un tempo considerable en degradarse, se é que o fan por completo. Nunha localidade como Vilagarcía, a maior parte destes globos acabarían no mar, provocando danos á fauna mariña, que podería inxerilos ou enredarse neles, segundo argumenta a formación nacionalista. Ademais, o BNG incide no uso do helio, un gas non fabricable e cunha reserva finita no planeta. Sinalan que non entenden como unha administración pública pode promover o emprego dun recurso non renovable para este tipo de actos. Ante esta situación, o Bloque insta o goberno local a dar "un paso atrás" e a destinar a partida económica deseñada para a solta de globos a "outro tipo de actuación que realmente sexa importante para a cidadanía de Vilagarcía". Reiteran a súa petición de poñer en marcha a campaña "O Mar comeza Aquí" para apostar por unha "Vilagarcía Limpa, Ecolóxica e Sustentábel", como se acordou no pleno municipal.