హ్యాట్రిక్ విజయాలతో దూకుడుమీదున్న స్టార్ ఎంటర్‌టైనర్ నవీన్‌ పొలిశెట్టి.. 2026 సంక్రాంతికి 'అనగనగా ఒక రాజు' చిత్రంతో అలరించడానికి రెడీ అయ్యారు. ఇందులో మీనాక్షి చౌదరి హీరోయిన్ గా నటిస్తోంది. ఇప్పటికే విడుదలైన 'భీమవరం బాల్మా' పాట ఆకట్టుకుంది. తాజాగా ఈ చిత్రం నుంచి 'రాజు గారి పెళ్లిరో' అనే సెకండ్ సింగిల్ వచ్చేసింది. ఈ పాట లాంచింగ్ ఈవెంట్ హైదరాబాద్ మల్లారెడ్డి ఇంజినీరింగ్‌ కాలేజీలో నిర్వహించారు.'రాజు గారి పెళ్లిరో' సాంగ్ లాంచ్ ఈవెంట్ లో నవీన్‌ పొలిశెట్టి - మీనాక్షి చౌదరి కలిసి డ్యాన్స్ చేసి అలరించారు. ఈ సందర్భంగా మాజీ మంత్రి మల్లారెడ్డి కోడలు డాక్టర్‌ ప్రీతిరెడ్డితో కూడా నవీన్ డ్యాన్స్ చేయించారు. ఇటీవల ఓ పాటకు స్టెప్పులేసి తనలోని డ్యాన్సర్‌ను పరిచయం చేసిన ప్రీతిరెడ్డి.. ఇప్పుడు 'అనగనగా ఒక రాజు' పాటకి నవీన్‌ పొలిశెట్టి, మీనాక్షీ చౌదరిలతో కలిసి డ్యాన్స్‌ చేసి ఆకట్టుకున్నారు.