ప్రపంచవ్యాప్తంగా డిసెంబర్‌ 25న క్రిస్మస్‌ వేడుకలు జరుపుకుంటే.. కొన్ని దేశాల్లో మాత్రం సందడి కానరాదు. జనవరి ప్రారంభంలో చాలామందికి క్రిస్మస్ పండుగ ముగిసిపోయి.. మిఠాయిలు తిన్న జ్ఞాపకాలు మాత్రమే మిగిలి ఉంటాయి. కానీ ప్రపంచవ్యాప్తంగా కోట్లాది మంది క్రైస్తవులకు, పండుగ వస్తుంది. యూరప్, ఆఫ్రికా, మధ్యప్రాచ్యంలోని అంటే మొత్తం క్రైస్తవులలో 12% పైగా ఉన్న వీరు చాలా పాశ్చాత్య దేశాల కంటే కొన్ని వారాల తర్వాత ఈ పండుగను జరుపుకుంటారు. దీనికి కారణం వారు క్రిస్మస్ తేదీని లెక్కించడానికి జూలియన్ క్యాలెండర్‌ను ఉపయోగించడమే.ఈ తేదీ తేడా ఎందుకు వచ్చిందంటే.., క్రీ.శ. 325లో క్రైస్తవ బిషప్‌లు ఈస్టర్ పండుగకు ఒక ప్రామాణిక తేదీని నిర్ణయించడానికి సమావేశమయ్యారు. అప్పుడు వారు రోమన్ పాలకుడు జూలియస్ సీజర్ క్రీ.శ. 46లో ప్రవేశపెట్టిన జూలియన్ క్యాలెండర్‌ను ఆధారంగా చేసుకున్నారు. ఈ క్యాలెండర్ సూర్యుని చుట్టూ భూమి తిరగడానికి పట్టే సమయం ఆధారంగా రూపొందించారు. అయితే, ఈ లెక్కల్లో సౌర సంవత్సరం పొడవును సుమారు 11 నిమిషాలు ఎక్కువగా అంచనా వేశారు. దీనివల్ల కాలక్రమేణా క్యాలెండర్, సౌర సంవత్సరం మధ్య వ్యత్యాసం పెరిగింది.ఖగోళ శాస్త్రం మరింత కచ్చితంగా మారడంతో 1582లో పోప్ గ్రెగొరీ జూలియన్ క్యాలెండర్‌లోని కొన్ని లోపాలను సరిచేయడానికి గ్రెగోరియన్ క్యాలెండర్‌ను రూపొందించారు. చాలా క్రైస్తవ దేశాలు దీనిని స్వీకరించాయి. బ్రిటన్ 1752లో గ్రెగోరియన్ క్యాలెండర్‌కు మారింది. అయితే, కొందరు ఆర్థోడాక్స్ క్రైస్తవులు దీనిని తప్పుగా భావించి, జూలియన్ క్యాలెండర్‌నే అనుసరించారు. 1923 నాటికి, రెండు క్యాలెండర్ల మధ్య 13 రోజుల తేడా ఏర్పడింది. దీంతో ఆర్థోడాక్స్ క్రిస్మస్ డిసెంబర్ 25 తర్వాత 13 రోజులకు, అంటే జనవరి 7న వచ్చింది.గ్రీస్‌లో కొందరు క్రైస్తవులు, "జనవరి 6న జరిగే ఎపిఫనీ రోజు వేడుకల్లో భాగంగా, చల్లగా ఉండే నీటిలోంచి చెక్క శిలువను పట్టుకోవడానికి నదిలో దూకుతారు. ఆర్థోడాక్స్ చర్చి సభ్యులందరూ క్రిస్మస్‌కు 40 రోజుల ముందు నుంచి ఉపవాసం పాటిస్తారు. ఈ సమయంలో మాంసం ముట్టరు. జనవరి 6న క్రిస్మస్ ఈవ్ ప్రార్థనల తర్వాత, చాలామంది కుటుంబ సభ్యులు, స్నేహితులతో కలిసి పెద్ద విందుతో తమ ఉపవాసాన్ని ముగిస్తారు.ఉక్రెయిన్, రష్యా ఆర్థోడాక్స్ విశ్వాసాలున్నవారు క్రిస్మస్ రోజున 12 రకాల సాంప్రదాయ వంటకాలను ఆరగిస్తారు. ఇవి క్రీస్తు శిష్యులను సూచిస్తాయి. వీటిలో క్యాబేజీ సూప్, కాల్చిన ఆపిల్స్, కూరగాయల కూర, రొట్టె వంటివి ఉంటాయి. ‘కుటియా’ లేదా ‘కుత్య’ అనే వంటకం చాలా ప్రసిద్ధి చెందింది. ఇది గోధుమలు లేదా ధాన్యాలు, తేనె, గసగసాలతో తయారుచేస్తారు. ఇది కుటుంబాన్ని, మంచి పంటను సూచిస్తుందని నమ్ముతారు. ఉక్రెయిన్‌లో ఇతర ఆర్థోడాక్స్ సంప్రదాయాలలో, శరదృతువులో పండిన ‘దిదుఖ్’ అనే గోధుమ కంకితో ఇంటిని, డైనింగ్ టేబుళ్లను అలంకరించడం వంటివి చేస్తారు.జీసస్ పుట్టుకను ఈస్టర్న్ ఆర్థడాక్స్ () దేశాలు డిసెంబర్ 25న జరుపుకోవు. రష్యా జనవరిలో న్యూఇయర్‌‌తో పాటు క్రిస్మస్‌ వేడుకలను జరుపుకుంటుంది. ఆయా దేశాలు అధికారికంగా రోజువారీ కార్యకలాపాలు గ్రెగోరియన్ క్యాలెండర్‌ను.. మతపరమైన వేడుకలకు జూలియన్‌ క్యాలెండర్‌ని అనుసరించడం విశేషం.