: భారత స్టాక్ మార్కెట్లలో అదే అనిశ్చితి కొనసాగుతోంది. గత 2 నెలలుగా సూచీలు ఒడుదొడుకుల్లో కొనసాగుతున్న సంగతి తెలిసిందే. అంతర్జాతీయంగా అనిశ్చితి, భారత్- అమెరికా మధ్య వాణిజ్య ఒప్పందం ఇంకా కుదరకపోవడం, ఇదే సమయంలో యూఎస్ ఫెడరల్ రిజర్వ్ కీలక వడ్డీ రేట్లను తగ్గించడం కారణంగా.. దీంతో తీవ్ర అమ్మకాల ఒత్తిడి కారణంగా సూచీలు పతనం అవుతున్నాయి. పలు హెవీ వెయిట్ స్టాక్స్ కూడా పడిపోతున్నాయి. సోమవారం సెషన్‌లో కూడా దేశీయ స్టాక్ మార్కెట్లు నష్టాల్లోనే ఉన్నాయి. ఈ వార్త రాసే సమయంలో (ఉదయం 11.30 గంటలకు) బొంబాయి స్టాక్ ఎక్స్చేంజి సూచీ సెన్సెక్స్ 260 పాయింట్ల నష్టంతో 84,790 స్థాయిలో ఉంది. నేషనల్ స్టాక్ ఎక్స్చేంజి సూచీ నిఫ్టీ 70 పాయింట్ల పతనంతో 25,970 స్థాయిలో కదలాడుతోంది. మార్కెట్లు నష్టాల్లో ట్రేడవుతున్నప్పటికీ.. ఒక ప్రభుత్వ కంపెనీ స్టాక్ మాత్రం అదరగొడుతోంది. అదే హిందుస్థాన్ కాపర్ లిమిటెడ్. గత కొన్ని సెషన్లుగా ఈ స్టాక్ దూసుకెళ్తూనే ఉంది. కిందటి శుక్రవారం సెషన్లో ఈ స్టాక్ ధర రూ. 475.60 వద్ద ముగియగా.. ఇవాళ ఇంట్రాడేలో ఏకంగా 15 శాతానికిపైగా పెరిగి రూ. 545.95 వద్ద గరిష్ఠాన్ని తాకింది. ఇది స్టాక్ ఆల్ టైమ్ గరిష్ఠ ధర. ప్రస్తుతం 10 శాతానికిపైగా లాభంతో రూ. 525 స్థాయిలో ఉంది. ఆల్ టైమ్ హై అంటే ఒక్క ఏడాదో రెండేళ్లో కూడా కాదు. ఏకంగా 15 ఏళ్ల గరిష్ఠ స్థాయిని నమోదు చేయడం విశేషం. దీంతో ఇందులో ఇన్వెస్ట్ చేసిన వారికి కాసుల వర్షం కురుస్తోంది. కంపెనీ మార్కెట్ విలువ రూ. 50.73 వేల కోట్లకు చేరుకుంది. స్టాక్ 52 వారాల కనిష్ఠ ధర రూ. 183.82 గా ఉంది. గత 5 రోజుల్లోనే ఈ స్టాక్ 31 శాతానికిపైగా పెరిగింది. 7 రోజుల్లో 48 శాతం పుంజుకుంది. నెలలో 50 శాతానికిపైగా పెరిగింది. 6 నెలల్లో 90 శాతం వరకు పెరగ్గా.. ఈ ఏడాదిలో ఇప్పటివరకు చూస్తే ఏకంగా 113 శాతం పుంజుకుంది. >> ఇటీవలి కాలంలో అంతర్జాతీయంగా అనిశ్చితి నేపథ్యంలో.. పలు లోహాల ధర భారీగా పెరుగుతోంది. . ఇవి కూడా ఆల్ టైమ్ గరిష్ఠ స్థాయిల్ని నమోదు చేశాయి. సోమవారం మరింత పెరిగింది. డిమాండ్‌కు తగ్గట్లుగా సరఫరా లేకపోవడంతో.. అటువైపు పెట్టుబడులు పెరుగుతున్నాయి. చైనాలో టన్నుకు 14,090 డాలర్ల వద్ద గరిష్ఠ స్థాయిని తాకింది. షాంఘై ఫ్యూచర్స్ ఎక్స్చేంజీలోనూ ధర భారీగా ఎగబాకింది. న్యూయార్క్ ఎక్స్చేంజి, లండన్ మెటల్ ఎక్స్చేంజీల్లోనూ ధర ఆల్ టైమ్ గరిష్ఠాలకు చేరుకుంది. భారత్‌లో ఎంసీఎక్స్ మార్కెట్లో కిలో కాపర్ ధర రూ. 1343 గా ఉంది. కిందటి రోజుతో పోలిస్తే 7 శాతానికిపైగా పెరిగింది.