A Policía Nacional investiga a morte supostamente accidental dun home que foi localizado este venres calcinado na súa vivenda de Mourente. O home, de 57 anos, vivía só nunha casa do lugar de Condesa, en Mourente, e este venres un familiar que acudiu a visitalo atopouno falecido. Segundo a información facilitada pola Policía Nacional, axentes da Policía Científica inspecionan o lugar para analizar o sucedido. A primeira hipótese que se manexa é que a orixe puido ser a explosión dun microondas, aínda que aínda non existen conclusións definitivas da investigación. Até o lugar tamén acudiu a Policía Local de Pontevedra. Fontes do Concello de Pontevedra confirman a aparición do cadáver tras o aviso dun familiar e que se atopaba calcinado, supostamente por electrocución. Todo apunta, por tanto, a unha morte accidental que podería ocorrer xa na xornada do xoves, 25 de decembro. Así, veciños da zona indicaron á Policía Nacional que sobre as 20.30 horas do xoves viron unha especie de refacho de luz, algo similar a un "chispazo", que saía da vivenda do falecido, aínda que non lle deron importancia. Xa este venres, sobre as 11.00 horas, un familiar que adoita acudir á súa casa atopou o cadáver. O 112 Galicia confirma tamén que a persoa que localizou o corpo percibiu primeiro que unha xanela da casa estaba queimada. Até o lugar tamén se desprazaron efectivos de Urxencias Sanitarias de Galicia-061.