മനാമ: രാജ്യത്തെ വിപണികളിൽ അവശ്യസാധനങ്ങളുടെ ലഭ്യത ഉറപ്പുവരുത്തുന്നതിനായി ബഹ്റൈൻ കിരീടാവകാശിയും പ്രധാനമന്ത്രിയുമായ ഹിസ് റോയൽ ഹൈനസ് പ്രിൻസ് സൽമാൻ ബിൻ ഹമദ് അൽ ഖലീഫ ദാനാ മാളിലെ ലുലു ഹൈപ്പർമാർക്കറ്റിൽ സന്ദർശനം നടത്തി. മേഖലയിലെ പുതിയ സംഭവവികാസങ്ങളുടെ പശ്ചാത്തലത്തിൽ, വിതരണ ശൃംഖലകൾ തടസ്സമില്ലാതെ പ്രവർത്തിക്കുന്നുണ്ടെന്ന് ഉറപ്പാക്കാനാണ് അദ്ദേഹം നേരിട്ടെത്തിയത്.ഹമദ് രാജാവിന്റെ ദീർഘവീക്ഷണത്തോടെയുള്ള ഭരണത്തിന് കീഴിൽ രാജ്യത്തിന്റെ സുരക്ഷയും സ്ഥിരതയും ഉറപ്പാക്കുന്നതിന്റെ ഭാഗമായാണ് ഈ സന്ദർശനം. വിപണിയിലെ ഉൽപ്പന്നങ്ങളുടെ ലഭ്യത വിലയിരുത്തിയ അദ്ദേഹം, ഇറക്കുമതിയും വിതരണവും സുഗമമായി നടക്കുന്നുണ്ടെന്ന് ഉറപ്പുവരുത്തുന്നത് ദേശീയ മുൻഗണനയാണെന്ന് വ്യക്തമാക്കി.സ്വകാര്യ മേഖലയുമായി സഹകരിച്ച് ഭക്ഷ്യസുരക്ഷയും സാമ്പത്തിക സ്ഥിരതയും ഉറപ്പാക്കുമെന്ന് അദ്ദേഹം പറഞ്ഞു. വിപണികളിൽ കൃത്യമായ നിരീക്ഷണം നടത്തുന്ന വ്യവസായ വാണിജ്യ മന്ത്രാലയത്തെയും ലുലു ഗ്രൂപ്പ് ഉൾപ്പെടെയുള്ള സ്വകാര്യ സ്ഥാപനങ്ങളെയും അദ്ദേഹം അഭിനന്ദിച്ചു. ധനകാര്യ മന്ത്രി ഷെയ്ഖ് സൽമാൻ ബിൻ ഖലീഫ അൽ ഖലീഫ, വ്യവസായ വാണിജ്യ മന്ത്രി അബ്ദുള്ള ബിൻ ആദൽ ഫക്രോ എന്നിവരും അദ്ദേഹത്തോടൊപ്പമുണ്ടായിരുന്നു.സന്ദർശന വേളയിൽ ലുലു ഗ്രൂപ്പ് ബഹ്റൈൻ ഡയറക്ടർ ജുസർ രൂപാവാലയും മറ്റ് മുതിർന്ന ഉദ്യോഗസ്ഥരും അദ്ദേഹത്തെ സ്വീകരിച്ചു. ഹൈപ്പർമാർക്കറ്റിലെ സാധനങ്ങളുടെ സ്റ്റോക്കും വിലനിലവാരവും കിരീടാവകാശി വിലയിരുത്തി. രാജ്യം ഏത് വെല്ലുവിളികളെയും നേരിടാൻ സജ്ജമാണെന്നും വിപണിയിൽ ചരക്കുകളുടെ സുഗമമായ ഒഴുക്ക് ഉറപ്പാക്കുമെന്നും അദ്ദേഹം ആവർത്തിച്ചു.The post വിപണിയിൽ നേരിട്ടെത്തി കിരീടാവകാശി; ദാനാ മാളിലെ ലുലു ഹൈപ്പർമാർക്കറ്റ് സന്ദർശിച്ചു; ഭക്ഷണസാധനങ്ങളുടെ ലഭ്യത ഉറപ്പാക്കി appeared first on Bahrain Vartha ബഹ്റൈൻ വാർത്ത.