తొలి సెమీ ఫైనల్‌లో ఆటకు మైండ్ బ్లాంక్ అయింది. స్టేడియంలో ఉన్నోళ్లు, టీవీల ముందు కూర్చున్నోళ్లు నోరెళ్లబెట్టి మరీ చూశారు. గ్రౌండ్‌లో ఉన్న సౌతాఫ్రికా ఫీల్డర్లు ఆకాశంలో చూడటం తప్ప ఏం చేయలేకపోయారు. . ఈ శతకంతో టీ20 వరల్డ్‌కప్‌లో ఫాస్టెస్ట్ సెంచరీ రికార్డును క్రియేట్ చేసి, క్రిస్ గేల్ పేరిట ఉన్న హిస్టరీని చెరిపేశాడు. 170 పరుగుల లక్ష్యంతో బరిలోకి దిగిన న్యూజిలాండ్ జట్టు ఫిన్ అలెన్ అద్భుత ఆరంభంతో తిరుగులేని విజయాన్ని సొంతం చేసుకుంది. ఆరంభం నుంచే బౌలర్లపై విరుచుకుపడిన అలెన్, సైఫర్టీ స్కోర్ బోర్డును పరుగులు పెట్టించారు. ఫోర్లు, సిక్సర్లతో ఈడెన్ గార్డెన్స్‌లో పరుగుల వరద పారించారు. కేవలం 19 బంతుల్లోనే హాఫ్ సెంచరీ పూర్తి చేసిన అలెన్, 33 బంతుల్లో సెంచరీ చేసి 12.5 ఓవర్లలోనే మ్యాచ్‌ను ముగించాడు. దాంతో ఫైనల్‌లో న్యూజిలాండ్ అడుగుపెట్టింది. ఫిన్ అలెన్ అద్భుత ఇన్నింగ్స్‌తో పదేళ్లకు పదిలంగా ఉన్న క్రిస్ గేల్ రికార్డు బద్దలయింది. ఐసీసీ టీ20 వరల్డ్‌కప్ చరిత్రలో అత్యంత తక్కువ బంతుల్లోనే సెంచరీ చేసిన ఆటగాళ్ల జాబితాలోకి ఫిన్ అలెన్ వచ్చేశాడు. క్రిస్ గేల్ 2016లో జరిగిన టీ20 వరల్డ్‌కప్‌లో ఇంగ్లండ్‌పై 47 బంతుల్లో సెంచరీ నమోదు చేశాడు. గత పదేళ్లుగా ఇదే టాప్ రికార్డుగా కొనసాగుతోంది. ఆ రికార్డును ఫిన్ అలెన్ బద్దలుకొట్టాడు. ఐసీసీ టీ20 వరల్డ్‌కప్ హిస్టరీలో అత్యంత తక్కువ బంతుల్లో సెంచరీలు చేసిన టాప్ 5 ఆటగాళ్లను ఒకసారి పరిశీలిస్తే. ఫిన్ అలెన్ 2026లో సౌతాఫ్రికాపై 33 బంతుల్లో సెంచరీ చేశాడు. 2016లో గేల్ ఇంగ్లండ్‌పై 47 బంతుల్లో, 2007లో గేల్ సౌతాఫ్రికాపై 50 బంతుల్లో, 2026లో హ్యారీ బ్రూక్ 50 బంతుల్లో పాకిస్తాన్‌పై, బ్రాండన్ మెక్‌కలమ్ 2012లో బంగ్లాదేశ్‌పై 51 బంతుల్లో సెంచరీ నమోదు చేశాడు. అదేవిధంగా టీ20 వరల్డ్‌కప్ నాకౌట్ మ్యాచ్‌లలో అత్యధిక భాగస్వామ్యం నెలకొల్పిన ఓపెనర్ల జాబితాలోనూ ఫిన్ అలెన్ - టిమ్ సైఫర్ట్ నిలిచారు. సౌతాఫ్రికాపై జరిగిన సెమీస్‌లో ఈ ఇద్దరూ 117 పరుగుల భాగస్వామ్యం నెలకొల్పారు. 2022 టీ20 వరల్డ్‌కప్ సెమీఫైనల్‌లో భారత్‌పై జోస్ బట్లర్ - అలెక్స్ హేల్స్ 170 పరుగులతో నాటౌట్‌గా నిలిచి వికెట్ పడకుండా మ్యాచ్ గెలిచారు. ఆ తర్వాత స్థానం ఈ టీ20 వరల్డ్‌కప్‌లో ఫిన్ అలెన్ - టిమ్ సైఫర్ట్‌దే. 2010 ఫైనల్‌లో క్రెయిన్ కీస్ వెటర్ - కెవిన్ పీటర్సన్ 111 పరుగుల భాగస్వామ్యం నెలకొల్పారు. 2022 సెమీఫైనల్‌లో బాబర్ ఆజామ్ - మొహమ్మద్ రిజ్వాన్ 105 పరుగుల భాగస్వామ్యం నెలకొల్పారు.