: దీర్ఘకాలంలో చాలా మంది మ్యూచువల్ ఫండ్లలో ఇన్వెస్ట్ చేసేందుకు ఆసక్తి చూపిస్తుంటారన్న సంగతి తెలిసిందే. ఇక్కడ చాలా కేటగిరీలకు చెందిన పథకాలు ఉంటాయి. స్మాల్ క్యాప్, మిడ్ క్యాప్, లార్జ్ క్యాప్, ఫ్లెక్సీ క్యాప్, హైబ్రిడ్, డెట్ ఓరియెంటెడ్ ఇలా ఎన్నో ఉంటాయి. వీటిల్లో మీ పెట్టుబడి సామర్థ్యం, ఆర్థిక లక్ష్యాలు, రిస్క్ ఫ్యాక్టర్ ఆధారంగా ఇన్వెస్ట్ చేయొచ్చు. గత కొంత కాలంగా స్టాక్ మార్కెట్లు తీవ్ర ఒడుదొడుకుల్లో ఉండగా.. స్మాల్ క్యాప్, మిడ్ క్యాప్, లార్జ్ క్యాప్ ఇలా అన్నింటా నష్టాలు ఎదురవుతూనే ఉన్నాయి. ఈ క్రమంలోనే డైవర్సిఫికేషన్‌కు అవకాశం ఉన్న ఫ్లెక్సీ క్యాప్ ఫండ్స్‌కు గత కొన్ని నెలలుగా ఆదరణ పెరిగింది. ఇన్వెస్టర్లు ఫస్ట్ ఛాయిస్‌గా వీటివైపే చూస్తున్నట్లు నిపుణులు చెబుతున్నారు. గత 5 సంవత్సరాల్లో అద్భుత రిటర్న్స్ అందించిన ఫ్లెక్సీ క్యాప్ స్కీమ్స్ గురించి ఇప్పుడు తెలుసుకుందాం. అవి హెచ్‌డీఎఫ్‌సీ ఫ్లెక్సీ క్యాప్ ఫండ్- డైరెక్ట్ ప్లాన్- గ్రోత్, క్వాంట్ ఫ్లెక్సీ క్యాప్ ఫండ్- డైరెక్ట్ ప్లాన్- గ్రోత్, బ్యాంక్ ఆఫ్ ఇండియా ఫ్లెక్సీ క్యాప్ ఫండ్. ఇవి వార్షిక ప్రాతిపదికన చూస్తే సగటున 20 శాతం CAGR కు మించి రిటర్న్స్ అందించాయి. గత ఐదేళ్లలో ఇన్వెస్టర్లకు కాసుల పంట పండించాయి. 1. హెచ్‌డీఎఫ్‌సీ ఫ్లెక్సీ క్యాప్ ఫండ్- డైరెక్ట్ ప్లాన్ఐదేళ్లలో లంప్ సమ్ పెట్టుబడులపై సగటున 20.35 శాతం CAGR రిటర్న్స్ వచ్చాయి. ఇక్కడ రూ. 1 లక్ష ఇన్వెస్ట్ చేసిన వారికి ఐదేళ్లలో రూ. 2.52 లక్షలు వచ్చాయి. ఐదేళ్ల సిప్ రిటర్న్స్ పరంగా చూస్తే 19.14 శాతం సీఏజీఆర్ రిటర్న్స్ వచ్చాయి. సిప్ పరంగా ఐదేళ్ల కిందట నెలకు రూ. 10 వేల చొప్పున ఇన్వెస్ట్ చేసిన వారికి ఈ క్రమంలో రూ. 9.65 లక్షలు వచ్చాయి. ఈ స్కీమ్ 2013లో లాంఛ్ అయింది. నిర్వహణలోని ఆస్తుల విలువ రూ. 97,452 కోట్లుగా ఉంది. నిప్టీ 500 టీఆర్ఐ ఈ పథకం పనితీరుకు కొలమానంగా ఉంది. ఇది ప్రధానంగా ఎస్బీఐ, హెచ్‌డీఎఫ్‌సీ, యాక్సిస్ బ్యాంక్, ఎస్బీఐ వంటి ఫైనాన్షియల్ స్టాక్స్‌లో ఇన్వెస్ట్ చేస్తుంది. 2. క్వాంట్ ఫ్లెక్సీ క్యాప్ ఫండ్- డైరెక్ట్ ప్లాన్లంప్ సమ్ పరంగా ఇక్కడ సగటున ఐదేళ్లలో 20.20 శాతం CAGR రిటర్న్స్ వచ్చాయి. ఐదేళ్ల కిందట రూ. 1 లక్ష ఇన్వెస్ట్ చేసిన వారికి రూ. 2.51 లక్షలు వచ్చాయి. అదే రూ. 10 వేల సిప్‌పై రూ. 8.41 లక్షలు వచ్చాయి. ప్రధానంగా ఇది సంవర్ధన మదర్‌సన్, అదానీ పవర్, అరబిందో ఫార్మా, అదానీ ఎంటర్‌ప్రైజెస్, జియో ఫైనాన్షియల్ సర్వీసెస్ వంటి వాటిల్లో ఇన్వెస్ట్ చేస్తుంది. 3. బ్యాంక్ ఆఫ్ ఇండియా ఫ్లెక్సీ క్యాప్ ఫండ్- డైరెక్ట్ ప్లాన్ఇక్కడ లంప్ సమ్ పెట్టుబడులపై వార్షికంగా సగటున 20.06 శాతం చొప్పున రాబడి అందింది. లక్ష పెట్టుబడిపై ఐదేళ్లలో రూ. 2.49 లక్షలు వచ్చాయి. ఇదే సిప్ విషయంలో నెలకు రూ. 10 వేల మేర సిప్ చేసిన వారికి ఐదేళ్లలో రూ. 9.10 లక్షలు వచ్చాయి. ఇది ప్రధానంగా ఎస్బీఐ, హిందుస్థాన్ ఏరోనాటిక్స్, వేదాంత, ఐసీఐసీఐ బ్యాంక్, భారతీ ఎయిర్‌టెల్ వంటి వాటిల్లో ఇన్వెస్ట్ చేసింది. గమనిక: పైన ఇచ్చింది గత ఐదేళ్లలో టాప్ పెర్ఫామెన్స్ చేసిన ఫ్లెక్సీ క్యాప్ మ్యూచువల్ ఫండ్స్ గురించి సమాచారం మాత్రమే. పెట్టుబడికి సిఫార్సు కాదు. మ్యూచువల్ ఫండ్ పెట్టుబడులు స్టాక్ మార్కెట్ రిస్క్‌కు లోబడి ఉంటాయి. కాబట్టి వీటిల్లో ఇన్వెస్ట్ చేసే ముందు ఆర్థిక నిపుణుల సలహా తీసుకోవాలి.