‘ధురంధర్‌ 2: ది రివెంజ్’ సినిమా బాక్సాఫీస్ దగ్గర కలెక్షన్ల వర్షం కురిపిస్తోంది. ఆదిత్య ధర్ దర్శకత్వంలో రణవీర్ సింగ్ హీరోగా నటించిన ఈ చిత్రం.. 3 రోజుల్లోనే ప్రపంచ వ్యాప్తంగా రూ.500+ కోట్లకుపైగా వసూళ్లతో దూసుకుపోతోంది. భారతీయ సినీ చరిత్రలో అతి తక్కువ సమయంలో ఈ ఫీట్ సాధించిన సినిమాల లిస్టులో చేరిపోయింది. ఇప్పటికే పలువురు సినీ ప్రముఖులు ఈ చిత్రాన్ని మెచ్చుకుంటూ పోస్టులు పెట్టారు. లేటెస్టుగా నటి ‘’ సినిమాపై తన రివ్యూను పంచుకున్నారు.స్పై యాక్షన్ థ్రిల్లర్ గా తెరకెక్కిన 'ధురంధర్ 2' సినిమాపై రేణు దేశాయ్ ప్రశంసలు కురిపించారు. సాయుధ దళాలను, నిఘా సంస్థలను గౌరవించేవారు.. మన దేశం గురించి తక్కువ చేసి మాట్లాడేవారు ధురంధర్ 1, 2 సినిమాలను తప్పకుండా చూడాలని ఇన్‌స్టాగ్రామ్‌ స్టోరీలో పోస్ట్ పెట్టారు. వారి త్యాగాల వల్లే మనం ఇళ్లలో ప్రశాంతంగా ఉన్నామన్నారు. ఈ సందర్భంగా చిత్రంలోని ఒక సన్నివేశాన్ని పంచుకుంటూ, ప్రధానమంత్రి నరేంద్ర మోదీపై రేణూ తనకున్న అపారమైన ప్రేమను చాటుకున్నారు. "మన సాయుధ దళాలు, నిఘా సంస్థల పట్ల మీకు కనీస గౌరవం ఉన్నా, వారి వల్లే మనం మన సౌకర్యవంతమైన ఇళ్లలో ప్రశాంతంగా జీవిస్తున్నాము, నిద్రపోతున్నాము. మీ సొంత దేశం గురించి అర్థం పర్థం లేకుండా మాట్లాడితే, దయచేసి ధురందర్ 1 & 2 సినిమాలు చూడండి" అని రేణు దేశాయ్ ఇన్‌స్టా స్టోరీలో రాసుకొచ్చారు. ఈ సందర్భంగా "ధర్మాన్ని పాటించడమే మీ కర్తవ్యం, ప్రతిఫలాన్ని ఆశించడం కాదు. విజయమనే వాగ్దానానికి మోసపోకండి. యుద్ధభూమి పిలుస్తోంది, కార్యాచరణలో ధైర్యంగా ఉండు'' అంటూ భగవద్గీతలోని శ్లోకాలను షేర్ చేసుకున్నారు. ఈ సందర్భంలోనే ప్రధాని మోదీ పట్ల తనకున్న అభిమానాన్ని వ్యక్తం చేశారు. "ఈ చాయ్‌వాలా భారతదేశానికి వచ్చినప్పటి నుండి మన ప్రజలలో భయం పెరిగింది" అంటూ 'ధురంధర్ 2' సినిమాలో బడే సాహెబ్ అలియాస్ దావూద్ ఇబ్రహీం చెప్పే డైలాగ్ కి సంబంధించిన రీల్ ని రేణు దేశాయ్ తన స్టోరీలో పోస్ట్ చేశారు. ''చాయ్‌ వాలా జల్వా'' అని క్యాప్షన్ పెట్టారు. "నేను బీజేపీకి, మన అద్భుతమైన పీఎం మోదీజీకి గర్వించదగిన అంధ భక్తురాలిని" అని రేణూ పేర్కొన్నారు. గతంలో ఆమె ఓ ఇంటర్వ్యూలో తనకు బీజేపీ అంటే ఇష్టమని చెప్పారు. తాను భక్తురాలినని, ఎప్పటికీ ఆయనకు తన సపోర్ట్ ఉంటుందని తెలిపారు. ఇప్పుడు మరోసారి తనను తాను మోదీకి అంధ భక్తురాలినని ప్రకటించుకున్నారు. రేణు పోస్ట్ నెట్టింట వైరల్ అవుతోంది.