Mutual Fund Investments: ప్రతి తల్లిదండ్రుల కల తమ పిల్లలకు అత్యున్నత విద్యను అందించడం. అయితే ప్రతి ఏటా పెరుగుతున్న విద్యా ఖర్చులు తట్టుకోవాలంటే కేవలం సాంప్రదాయ పొదుపు సరిపోదు హైరిటర్న్స్ ఇచ్చే సరైన చోట పెట్టుబడి పెట్టాలి. ఈ నేపథ్యంలో మ్యూచువల్ ఫండ్స్‌లో ఇన్వెస్ట్ చేస్తున్న వారి సంఖ్య నానాటికీ పెరుగుతోంది. పిల్లలు పుట్టిన సమయంలోనే వారి ఉన్నత చదువుల కోసం పెట్టుబడులను ప్రారంభిస్తున్నారు. అయితే ఎకనామిక్ టైమ్స్ నిపుణులు పలు సూచనలు చేశారు. ఏ వయస్సులో పెట్టుబడి మొదలు పెట్టాలి? ఏయే ఫండ్లలో డబ్బులు కేటాయించాలి? అనే అంశాలు ఇప్పుడు మనం తెలుసుకుందాం. పిల్లల చదువుల కోసం ఎంత త్వరగా పెట్టుబడి మొదలుపెడితే అంత ఎక్కువ లాభం ఉంటుందని సూచిస్తున్నారు. ఈక్విటీ, డెట్, హైబ్రిడ్ ఫండ్ల మధ్య సమతుల్యత పాటించాలని, లక్ష్యం చేరువవుతున్న కొద్దీ రిస్క్ తగ్గించుకునేలా పోర్ట్‌ఫోలియోను సర్దుబాటు చేయాలంటున్నారు.ద్రవ్యోల్బణాన్ని పరిగణనలోకి తీసుకుని భవిష్యత్తు ఖర్చులను అంచనా వేయాలని సూచిస్తున్నారు. పిల్లలు పుట్టినప్పటి నుంచే పెట్టుబడి ప్రారంభించడం ఉత్తమం. దీనివల్ల మీకు 15 నుంచి 18 ఏళ్ల సుదీర్ఘ సమయం దొరుకుతుంది. సుదీర్ఘ కాలం పెట్టుబడి పెట్టడం వల్ల కాంపౌండింగ్ ద్వారా చిన్న మొత్తాలు కూడా పెద్ద నిధిగా మారతాయి.పెట్టుబడి కాలపరిమితిని బట్టి ఫండ్లను ఎంచుకోవాలని నిపుణులు సూచిస్తున్నారు. లాంగ్ టర్మ్ (10 ఏళ్ల కంటే ఎక్కువ) ఉండే ఫండ్లలో ఎక్కువ భాగం (సుమారు 70-80 శాతం) లార్జ్ క్యాప్ లేదా ఫ్లెక్సీ క్యాప్ ఫండ్లలో ఇన్వెస్ట్ చేయాలి. ఇవి ద్రవ్యోల్బణాన్ని అధిగమించే లాభాలను ఇస్తాయి. మిడ్ టర్మ్ (5 నుంచి 10 ఏళ్లు) ఫండ్స్‌లో రిస్క్, రిటర్న్ సమతుల్యంగా ఉండటానికి హైబ్రిడ్ లేదా బ్యాలెన్స్‌డ్ అడ్వాంటేజ్ ఫండ్లను ఎంచుకోవాలి. షార్ట్ టర్మ్ (3 ఏళ్ల లోపు) అయితే లక్ష్యానికి చేరువైనప్పుడు డబ్బును సురక్షితమైన డెట్ ఫండ్లు లేదా లిక్విడ్ ఫండ్లలోకి మార్చుకోవాలి. నిపుణుల అభిప్రాయం ప్రకారం మీ పాప కాలేజీకి వెళ్లడానికి 2-3 ఏళ్ల సమయం ఉందనగా ఈక్విటీల్లో ఉన్న లాభాలను క్రమంగా డెట్ ఫండ్లలోకి మళ్లించాలి. దీనివల్ల మార్కెట్ అకస్మాత్తుగా పడిపోయినా మీ పాప చదువుకు కావాల్సిన అసలు సొమ్ము సురక్షితంగా ఉంటుంది.స్టెప్ అప్ సిప్ప్రతి ఏటా మీ ఆదాయం పెరిగే కొద్దీ సిస్టమాటిక్ ఇన్వెస్ట్‌మెంట్ ప్లాన్ () మొత్తాన్ని కూడా 5 శాతం నుంచి 10 శాతం పెంచాలి. దీనిని స్టెప్ అప్ ఎస్ఐపి అంటారు. ఇది మీరు అనుకున్న లక్ష్యాన్ని త్వరగా లేదా అంతకంటే ఎక్కువ నిధితో చేరుకోవడానికి సహాయపడుతుంది. మార్కెట్లో అనేక చిల్డ్రన్ గిఫ్ట్ ఫండ్స్ ఉన్నాయి. అయితే, ఇవి కచ్చితంగా తీసుకోవాలని లేదు. సాధారణ డైవర్సిఫైడ్ ఈక్విటీ ఫండ్లు కూడా అంతే మంచి లాభాలను ఇస్తాయి. కానీ, క్రమశిక్షణతో కూడిన పెట్టుబడి కోసం ఈ ప్రత్యేక ఫండ్లు ఉపయోగపడతాయి. పిల్లల విద్యా నిధి కోసం చేసే ప్రయాణంలో ఓర్పు చాలా ముఖ్యం. మార్కెట్ ఒడుదొడుకులకు భయపడకుండా, లక్ష్యం వైపు స్థిరంగా పెట్టుబడి కొనసాగించాలి. సరైన ఫండ్ మిక్స్, సమయానుకూల సర్దుబాట్లు మీ పాప భవిష్యత్తుకు భరోసా ఇస్తాయి.