ఆంధ్రప్రదేశ్ ప్రభుత్వం పేదవాళ్ల సొంత ఇంటి కలను నిజం చేయబోతోంది. రాష్ట్రవ్యాప్తంగా మరోసారి గృహ ప్రవేశాలకు సిద్ధమైంది. తొలి విడతగా 3 లక్షల ఇళ్లను లబ్ధిదారులకు అందజేయగా.. తాజాగా మరో 2.50 లక్షల ఇళ్ల నిర్మాణం పూర్తి చేసి లబ్ధిదారులకు అందించనున్నారు. వాస్తవానికి ఉగాదికి ఈ ప్రక్రియ పూర్తి చేయాలని భావించినా కుదరలేదు. ఈ మేరకు ఈ నెల 30న ముఖ్యమంత్రి చంద్రబాబు చేతుల మీదుగా ఈ 2.50 లక్షల గృహప్రవేశాలు నిర్వహించాలని నిర్ణయం తీసుకున్నారు. ఈ 2.50 లక్షల గృహాల్లో.. 1.42 లక్షలు కాలనీల్లో చేపట్టిన గృహాలు కాగా.. మిగిలిన 1.08 లక్షలు టిడ్కో ఇళ్లు ఉన్నాయి. తిరుపతి జిల్లా నాయుడుపేటలో నిర్వహించే కార్యక్రమంలో ఈ గృహ ప్రవేశాల కార్యక్రమం నిర్వహించనున్నారు.. పాల్గొంటారు, లబ్ధిదారులతో స్వయంగా మాట్లాడనున్నారు. 2017-19 అప్పటి టీడీపీ ప్రభుత్వ హయాంలో కొంతమంది టిడ్కో ఇళ్ల కోసం దరఖాస్తు చేసుకున్నారు.. లబ్ధిదారు వాటా డబ్బులు కూడా చెల్లించారు. గత ప్రభుత్వ హయాంలో వారందరికి టిడ్కో ఇళ్లు మంజూరు చేయలేదు. కొంతమందిని జాబితా నుంచి తొలగించి, ఇళ్లు కూడా రద్దు చేసిన పరిస్థితి. అయితే లబ్ధిదారు వాటా కింద చెల్లించిన రూ.172 కోట్లు కూడా తిరిగి చెల్లించలేదు. ఇలా మొత్తం 83వేలమంది ఇబ్బందిపడ్డారు. ఈ సమస్యను గమనించిన కూటమి ప్రభుత్వం.. లబ్ధిదారుల వాటా కింద చెల్లించిన డబ్బుల్ని బాధితుల బ్యాంకు అకౌంట్‌లలో జమ చేయాలని ఇటీవల నిర్ణయం తీసుకున్న సంగతి తెలిసిందే. అయితే ఈ డబ్బుల్ని కూడా గృహప్రవేశాల కార్యక్రమం రోజున.. అదే వేదికపై ముఖ్యమంత్రి చేతుల మీదుగా బ్యాంక్ అకౌంట్‌లలో ఈ జమ చేస్తారు.రాష్ట్రవ్యాప్తంగా ఈ ఏడాది డిసెంబర్‌ నాటికి టిడ్కో గృహ సముదాయాల్లో చేపట్టిన 2.62 లక్షల గృహాలను పూర్తి చేసి లబ్ధిదారులకు అందించాలని టార్గెట్ పెట్టుకుంది ప్రభుత్వం. ఇళ్ల పనులు వేగంగా జరుగుతున్నాయి.. ఇప్పటికే ఈ ఇళ్ల నిర్మాణం కోసం అవసరమైన రూ.4 వేల కోట్లను కూడా టిడ్కోకు సమకూర్చింది. తాజాగా రాజధాని అమరావతి పరిధిలోని సీఆర్‌డీఏతో పాటుగా మంగళగిరి, మచిలీపట్నం, విశాఖపట్నం నుంచి 20 వేల టిడ్కో గృహాల నిర్మాణానికి ప్రతిపాదనల్ని ప్రభుత్వానికి అందజేశారు. ఈ టిడ్కో ఇళ్ల నిర్మాణం చేపట్టాలని టిడ్కో సంస్థ ఇప్పటికే ప్రాథమికంగా నిర్ణయం తీసుకుంది. మొత్తం మీద కూటమి ప్రభుత్వం అధికారంలోకి వచ్చిన తర్వాత గత 20 నెలల్లోనే రెండో సారి ఇళ్ల నిర్మాణాలను పూర్తి చేసింది.. ఇప్పటికే తొలి విడతలో అందజేయగా, రెండో విడతలో ఈలబ్ధిదారులకు ఇళ్లు అందించేందుకు అన్నిఏర్పాట్లూ చేసింది.