March 18 Gold Silver Rates: ఇరాన్- ఇజ్రాయెల్ యుద్ధం ప్రారంభమైనప్పటి నుంచి పసిడి ధరలు పతనం అవుతూనే ఉన్న సంగతి తెలిసిందే. ఇలాంటి సంక్షోభ సమయాల్లో బంగారం, వెండి ధరలు ఇంకా పెరగాల్సి ఉంటుంది. ఇవి సురక్షిత పెట్టుబడి సాధనాలుగా మారాల్సి ఉంటుంది. కానీ ఇప్పుడు సీన్ రివర్స్ అయింది. ఈ యుద్ధం కారణంగా ముడి చమురు ధరలు పెరుగుతుండటం ద్రవ్యోల్బణం భయాల్ని పెంచేసింది. మరోవైపు యూఎస్ ఫెడరల్ రిజర్వ్ కీలక వడ్డీ రేట్లను ఈసారి తగ్గించకపోవచ్చన్న అంచనాలు నెలకొన్నాయి. వీటికి తోడు యూఎస్ డాలర్ పెరగడం వల్ల బంగారం, వెండి వంటి లోహాలు ఆకర్షణ కోల్పోయాయి. దీంతో ధర వరుసగా దిగొచ్చింది. యుద్ధం ప్రారంభమైన ఫిబ్రవరి 28 నుంచి చూస్తే గోల్డ్ రేటు తులంపై రూ. 12 వేలకుపైగా తగ్గుముఖం పట్టింది. అయితే . మార్చి 18న ధరల్లో మార్పు కనిపించింది. ప్రస్తుతం వార్త రాస్తున్న సమయంలో ఉదయం 7 గంటలకు హైదరాబాద్ మార్కెట్లో 22 క్యారెట్ల పుత్తడి ధర రూ. 600 పెరగడంతో 10 గ్రాములకు రూ. 1,44,900 వద్ద ఉంది. దీనికి ముందు వరుసగా రూ. 2050, రూ. 950, రూ. 1400, రూ. 1000 మేర తగ్గుతూ వచ్చింది. మరోవైపు 24 క్యారెట్ల గోల్డ్ రేటు రూ. 660 పెరగ్గా తులం రూ. 1,58,080 వద్ద ట్రేడవుతోంది. >> బంగారం ధరల బాటలోనే వెండి రేట్లు కూడా పుంజుకున్నాయి. ఇప్పుడు రూ. 4 వేలు పెరగడంతో హైదరాబాద్ మార్కెట్లో కేజీ సిల్వర్ రేటు ప్రస్తుతం రూ. 2.80 లక్షల వద్ద ఉంది. దీనికి ముందు మార్చి 16న రూ. 4 వేలు తగ్గగా.. దానికి ముందు మార్చి 14 రూ. 10 వేలు, మార్చి 12న కూడా రూ. 10 వేల మేర ధర దిగొచ్చింది. ఈ ఏడాది జనవరి 29న సిల్వర్ రేటు కేజీకి రూ. 4.25 లక్షల వద్ద ఆల్ టైమ్ గరిష్ఠ స్థాయిని నమోదు చేసింది. అక్కడి నుంచి చూస్తే రూ. 1.45 లక్షల మేర ధర తగ్గింది. ఇంటర్నేషనల్ మార్కెట్లో చూస్తే బంగారం, వెండి ధరలు మళ్లీ దిగొచ్చాయి. స్పాట్ గోల్డ్ రేటు ఔన్సుకు 5 వేల డాలర్ల స్థాయిలో ఉంది. కిందటి రోజుతో పోలిస్తే ఇది తగ్గింది. సిల్వర్ రేటు 79 డాలర్ల స్థాయిలో కదలాడుతోంది. డాలరుతో చూస్తే రూపాయి విలువ రూ. 92.42 స్థాయిలో ఉంది. అంతర్జాతీయ ధరలకు అనుగుణంగా.. దేశీయంగా కూడా బంగారం, వెండి ధరలు మార్చి 18న ఉదయం 10 గంటలకు మళ్లీ తగ్గే అవకాశాలు కనిపిస్తున్నాయి.