: , పెన్షనర్లు.. కరవు భత్యం (DA), డియర్‌నెస్ రిలీఫ్ (DR) కోసం ఎదురుచూస్తున్నారని చెప్పొచ్చు. ప్రతిసారీ ఈ సమయానికి కేంద్రం డీఏ ప్రకటిస్తుంటుంది కానీ ఈసారి మాత్రం చాలా ఆలస్యం అయింది. పెరుగుతున్న ధరలకు పరిహారంగా కేంద్రం.. ద్రవ్యోల్బణం లెక్కల ఆధారంగా ఉద్యోగులకు డీఏ, పెన్షనర్లకు డీఆర్ ప్రకటిస్తుంటుంది. ఏటా రెండు సార్లు దీనిని పెంచుతుంటుంది. సాధారణంగా జనవరి 1, జులై 1 నే దీనిని ప్రకటించాల్సి ఉన్నా కూడా ఆలస్యంగా తొలి అర్ధభాగంలో హోలీ సమయంలో ఒకసారి.. రెండో అర్ధభాగంలో దీపావళి సమయంలో మరోసారి డీఏను ప్రకటిస్తుంటుంది. ఎప్పుడు ప్రకటించినా.. అమలు చేసేది మాత్రం జనవరి 1, జులై 1 నుంచే. అయితే ఈసారి మాత్రం హోలీ ముగిసి చాలా రోజులే అయినా.. ఇంకా డీఏ గురించి కేంద్రం ఎలాంటి ప్రకటనా చేయలేదు. దీంతో ఉద్యోగులు నిరాశలో కూరుకుపోయారు. >> అయితే కాస్త ఆలస్యమైనా ఈ నెలలోనే ఉద్యోగులకు డీఏ, డీఆర్ పెంపు ఉంటుందని అంచనా వేస్తున్నారు. ఇది ఇండస్ట్రియల్ వర్కర్స్- ఆల్ ఇండియా కన్జూమర్ ప్రైస్ ఇండెక్స్ (AICPI- IW) లెక్కల ఆధారంగా నిర్ణయిస్తారు. ఈ లెక్కన కార్మిక శాఖ గణాంకాల ప్రకారం.. ఈసారి 2 శాతంగా ఉంటుందని తెలుస్తోంది. గత కొన్ని విడతల్లో చూస్తే డీఏ కనీసం 3 లేదా 4 శాతం వరకు పెరిగింది. దీంతో ఈసారి 2 శాతంగానే ఉంటే అది చాలా తక్కువ అని చెప్పొచ్చు. ప్రస్తుతం డీఏ 58 శాతంగా ఉండగా.. ఇది 2 శాతం పెరిగితే 60 శాతానికి చేరుతుంది. డీఏ అనేది బేసిక్ పే పై వర్తిస్తుంది. డీఏ పెరిగితే.. ఉద్యోగుల బై హ్యాండ్ శాలరీ (చేతికి అందే జీతం) పెరుగుతుందని చెప్పొచ్చు. సాధారణంగా డీఏ 50 శాతం దాటితే.. దీనిని బేసిక్ పే లో విలీనం చేయాలి. ప్రస్తుతం 8వ వేతన సంఘం అమలు వాయిదా నేపథ్యంలో ఇది కూడా ఆలస్యం అవుతున్నట్లు తెలుస్తోంది. డీఏ బేసిక్ పే లో విలీనం అయితే.. మళ్లీ డీఏ సున్నా శాతం నుంచి ప్రారంభమవుతుందని చెప్పొచ్చు. ఇక రూ. 30 వేలు, 40 వేలు, 50 వేలు బేసిక్ పే ఉంటే.. జీతం ఎంత పెరుగుతుందో మనం ఇప్పుడు చూద్దాం. బేసిక్ పే రూ. 30 వేలు ఉన్నట్లయితే 58 శాతం డీఏ ఉంటే.. ఇక్కడ డీఏ రూపంలోనే ఉద్యోగికి రూ. 17,400 వస్తుంది. ఇప్పుడు 2 శాతం పెరిగితే అది రూ. 600 పెరుగుతుంది. అప్పుడు డీఏ రూపంలో రూ. 18 వేలు అందుతాయి. ఇదే రూ. 40 వేల బేసిక్ ‌పే పై చూస్తే 58 శాతం డీఏతో ఉద్యోగికి డీఏ రూపంలో రూ. 23,200 వస్తుంది. మరో 2 శాతం పెరిగితే ఇది రూ. 24 వేలు వస్తుంది. మరోవైపు 50 వేల బేసిక్ పే ఉంటే.. డీఏ రూ. 29 వేలుగా ఉంటుంది. మరో 2 శాతం పెరిగితే అప్పుడు ఇది రూ. 30 వేలు అవుతుంది.