ماہِ رمضان میں ہندوستانی فوج کی مختلف بٹالین جموں و کشمیر کے زیادہ تر اضلاع میں افطار پارٹی کا اہتمام کر رہی ہے۔ اسی سلسلے میں ہندوستانی فوج کی سرلا بٹالین نے پیر (16 مارچ) کو پونچھ میں افطار پارٹی کا انعقاد کیا تھا۔ اس دوران سینکڑوں روزے داروں نے فوج کے جوانوں کے ساتھ اپنا روزہ کھولا، اس موقع پر دیگر مذاہب اور برادریوں سے تعلق رکھنے والے افراد بھی اس میں شریک ہوئے۔#WATCH | Jammu and Kashmir: Indian Army's Sarla Battalion organised an Iftar party for the people of nearby villages in Poonch today pic.twitter.com/4ISV5NQdyo— ANI (@ANI) March 16, 2026واضح رہے کہ جموں و کشمیر میں پونچھ ضلع ہندوستان-پاکستان لائن آف کنٹرول (ایل او سی) کے قریب ہے۔ یہاں تعینات ہندوستانی فوج کی سرلا بٹالین نے پیر کو افطار پارٹی کا اہتمام کیا۔ اس میں ایل او سی سے متصل علاقوں میں رہنے والے معزز شہریوں اور سابق فوجیوں نے شرکت کی اور ایک ساتھ روزہ افطار کیا۔ اس کے بعد نماز ادا کر علاقے میں امن اور بھائی چارے کی دعا مانگی۔ اس موقع پر مقامی لوگوں نے فوج کا شکریہ ادا کرتے ہوئے کہا کہ ہندوستانی فوج ہر سال روزے داروں کے لیے افطار پارٹی کا اہتمام کرتی ہے۔پونچھ کے کرمرہا گاؤں کے رہنے والے چودھری فضل کہتے ہیں کہ سرلا بٹالین نے آج مسلم، ہندو اور سکھ افراد کو مدعو کیا اور یہاں روزہ افطار کا اہتمام کیا۔ ہمارا باہمی میل جول بہت اچھا رہا اور ہم ہندوستانی فوج کے بہت مشکور ہیں۔ ہم اپنی فوج کے شکرگزار ہیں، ہماری بہادر فوج دشمن کا چٹان کی طرح مقابلہ کر رہی ہے اور آگے بھی کرتی رہے گی۔ اس کے ساتھ ہی ہمارے عام شہری بھی ان کے ساتھ کندھے سے کندھا ملا کر کھڑے ہیں۔ اس کے علاوہ ایک دیگر گاؤں والے نے کہا کہ ’’فوج نے ہر سال کی طرح اس سال بھی افطار پارٹی کا اہتمام کیا ہے۔ علاقے کے لوگوں میں فوج کے تئیں احترام میں اضافہ ہوا ہے۔‘‘ہندوستانی فوج کی مختلف بٹالین نے پیر کو جمو و کشمیر کے کئی حصوں میں روزہ افطار کا اہتمام کیا۔ بارڈر سے متصل اضلاع میں فوج کی مختلف ٹکریاں شہری اور دیہی آبادی میں افطار پارٹی کا اہتمام کر رہی ہے۔ فوج کی روزہ افطار پارٹی میں بچے، جوان اور بزرگ بڑی تعداد میں پہنچ رہے ہیں۔ مقامی لوگوں کا کہنا ہے کہ اس طرح کے انعقاد سے فوج پر اعتماد میں اضافہ ہوتا ہے۔ فوج نے پیر کو سری نگر، کشمیر، پونچھ اور دیگر علاقوں میں بھی افطار پارٹیوں کا اہتمام کیا ہے۔ ان تمام افطار پارٹیوں میں تمام برادریوں کے لوگوں نے شرکت کی۔قابل ذکر ہے کہ جموں و کشمیر کے کپواڑہ میں بھی ہندوستانی فوج نے افطار پارٹی کا اہتمام کیا۔ اس دوران فوج کے جوانوں نے سینکڑوں روزے داروں کے درمیان میں بیٹھ کر روزہ کھولا۔ فوج نے باہمی ہم آہنگی کو فروغ دینے اور سماجی تعلقات کو مضبوط کرنے کی مقصد سے افطار پارٹی کا اہتمام کیا تھا۔ اس کے علاوہ ہندوستانی فوج کے ’کارگل سینٹینلس‘ (121 انفنٹری بریگیڈ) نے حال ہی میں لداخ میں واقع کارگل سینک انسٹی ٹیوٹ (کے ایس آئی) میں افطار پارٹی کا اہتمام کیا تھا۔