US Fed Meeting: యూఎస్ ఫెడరల్ రిజర్వ్ కీలక సమావేశానికి ముందు బంగారం, వెండి ధరలు మరోసారి తగ్గుముఖం పట్టాయి. మార్చి 17- 18 తేదీల్లోనే వడ్డీ రేట్లకు సంబంధించి పాలసీ సమావేశం నిర్వహించనుంది ఫెడ్. ప్రస్తుతం వడ్డీ రేట్ల శ్రేణి 3.50- 3.75 శాతంగా ఉండగా.. అక్కడే యథాతథంగా కొనసాగించనున్నట్లు అంచనా వేస్తున్నారు. ఇదే తగ్గేందుకు కారణం అవుతోంది. గతేడాది ఫెడ్ వరుసగా వడ్డీ రేట్లను తగ్గిస్తూ రాగా.. బంగారం ధరలు పెరిగాయి. ఫెడ్ వడ్డీ రేట్లను తగ్గిస్తే గోల్డ్ రేట్లు పెరుగుతుంటాయి. ఇప్పుడు ఆ అంచనాలు తగ్గుముఖం పట్టడంతో బంగారం ధర తగ్గుతోంది. పశ్చిమాసియాలో యుద్ధం కారణంగా ద్రవ్యోల్బణం పెరుగుతుందన్న భయాలు ఎక్కువయ్యాయి. దీంతో ఫెడ్ ఈసారి వడ్డీ రేట్లను తగ్గించకపోవడమే మంచిదని భావిస్తోంది. ఇదే బంగారం, వెండిని.. ఆకర్షణ కోల్పోయేలా చేస్తుంది. మరోవైపు యూఎస్ డాలర్ కూడా వరుసగా పుంజుకుంటుండటంతో బంగారం ధరలు దిగొస్తున్నాయి. డాలర్ పెరిగితే.. దానివైపు పెట్టుబడులు పెరిగి.. ఇదే సమయంలో బంగారం విలువ తగ్గుతుంటుంది. యుద్ధం ప్రారంభమైనప్పటి నుంచి చూస్తే వరుసగా 2 వారాలు డాలర్ విలువ పెరిగింది. మరోవైపు యూఎస్ ట్రెజరీ బాండ్ ఈల్డ్స్ కూడా పుంజుకున్నాయి. ఇది బంగారం విలువను తగ్గిస్తుంది.ఇప్పుడు మార్చి 17న ఉదయం 7 గంటల సమయంలో ఇంటర్నేషనల్ మార్కెట్లో గోల్డ్ రేట్లు తగ్గుముఖం పట్టాయి. స్పాట్ గోల్డ్ రేటు ఔన్సుకు 5 వేల డాలర్ల స్థాయిలో ఉంది. మార్చి 16న రాత్రి ఇంకా భారీగానే తగ్గింది. సిల్వర్ రేటు చూస్తే 81 డాలర్ల స్థాయిలో కొనసాగుతోంది. కిందటి రోజు ఇది ఒక దశలో 78 డాలర్ల స్థాయికి కూడా పతనమైంది. మరోవైపు డాలరుతో పోలిస్తే రూపాయి మారకం విలువ ప్రస్తుతం రూ. 92.30 వద్ద ఉంది.దేశీయంగా కూడా బంగారం ధరలు మళ్లీ భారీగా దిగొచ్చాయి. హైదరాబాద్ నగరంలో 22 క్యారెట్ల పసిడి ధర మార్చి 17న ఉదయం 7 గంటలకు ఒక్కరోజులోనే రూ. 2050 తగ్గడంతో 10 గ్రాములకు ప్రస్తుతం రూ. 1,44,300 వద్ద ఉంది. దీనికిముందు మార్చి 12, 13, 14 తేదీల్లో వరుసగా రూ. 1000, రూ. 1400, రూ. 950 మేర తగ్గింది. ఇలా 5 రోజుల్లోనే రూ. 5400 మేర తగ్గడం విశేషం. ఇక 24 క్యారెట్ల గోల్డ్ రేటు చూస్తే రూ. 2240 తగ్గగా.. తులం ప్రస్తుతం రూ. 1,57,420 వద్ద కొనసాగుతోంది. మరోవైపు హైదరాబాద్ మార్కెట్లో ఇవాళ రూ. 4 వేలు తగ్గి కేజీకి రూ. 2.76 లక్షల వద్ద కొనసాగుతోంది.